بەڵێن بدە

بەڵێن بدە
کە تاریکیم بۆ ڕانەخەی
بەڵێن بدە
کە شەختەبەند ناخەیتە بەر پێم
منیش بەڵێنت پێ ئەدەم
دان بە ڕابردووما بنێم
پێش چاوی تۆ
لە پەرداخی وەنەوشەیی
چاوی ترم پێک هەڵداوە
پێش نامەی تۆ
قژی گەلێک نامەی ترم داهێناوە

پێش سنگی تۆ
زۆر سنگی تر
چەپکەگوڵی تەزووی سووریان بۆ چنیوم
پێش ژوانی تۆ
زۆر ژوانی تر
ڕێگەی دووریان پێ بڕیوم
شاعیرێک بووم
گەرووی وشکم
بە دوای قومێک ئاوا وێڵ بوو
بۆ بارانی هەر ئاسمانێک نووشتامەوە
ئاوی لێڵ بوو
گەر ئەتەوێ خوێنی دەماری شیعرم بیت
داستانێک بیت بێکۆتایی
گەر ئەتەوێ
خۆشەویستیت بەدوایدا نێت
ماچی سەردی ماڵاوایی

بەڵێن بدە ئاسمانم بیت
بەڵێن بدە
هەناسەم بیت سێبەرم بیت بارانم بیت
تاکوو منیش شانۆی کۆنم جێ بهێڵم
دەمامکی ڕووم فڕێ دەم
دوو باڵی پڕ خۆشەویستیم
لە گەردەنت گرێ بدەم

Belên bide
Ke tarîkîm bo ranexey
Belên bide
Ke şextebend naxeyte ber pêm
Minîş belênit pê edem
Dan be rabirdûma binêm
Pêş çawî to
Le perdaxî wenewşeyî
Çawî tirim pêk heldawe
Pêş namey to
Qijî gelêk namey tirim dahênawe

Pêş singî to
Zor singî tir
Çepkegulî tezûy sûryan bo çinîwim
Pêş jwanî to
Zor jwanî tir
Rêgey dûryan pê birîwim
Şa’îrêk bûm
Gerûy wişkim
Be dway qumêk awa wêl bû
Bo baranî her asmanêk nûştamewe
Awî lêl bû
Ger etewê xwênî demarî şî’irim bît
Dastanêk bît bêkotayî
Ger etewê
Xoşewîstît bedwayda nêt
Maçî serdî malawayî

Belên bide asmanim bît
Belên bide
Henasem bît sêberim bît baranim bît
Takû minîş şanoy konim cê bihêlim
Demamkî rûm firê dem
Dû balî pir xoşewîstîm
Le gerdenit girê bidem