ئێستا کچێک نیشتمانمە - بەشی چوارەم

[ئەمڕۆ نیشتیمان لەسەر جادەی سەهۆڵەکە خۆی کردبوو بە فریشتە و
دەمامکی یەکێک لە پاکیزەکانی بەستبوو
لە پڕێکدا ژنێکی ڕەقەڵەی ڕەشتاڵەی ناو ئەنفال هات و
بە دوو پەنجە دەمامکی خستە خوارێ و
ئەوسا ئیتر لە هەردوو چاوی و
هەردوو کونەلووتی و دەمیەوە
تۆپەڵ تۆپەڵ، کرم و قالۆنچە و سیسرک و ملە و هەزارپێکان هاتنە دەرێ!
بەیانیت باش من ناوم 'قەڵەم'ە
لە ناو پەنجەکانی 'با'یەکی گەنجدام
خاوەنەکەم هەمیشە هەتاوم پێ ئەنووسێتەوە
ئەو سڵ لە هیچ تارماییە و
لاستیکێکی خەتکوژانەوەی مقەستەکان ناکاتەوە
من هەندێ جار کە ئەو پێم ئەنووسێت دڵم ئەکەوێتە خورپەخورپ
نایشیشارمەوە ئەترسم!
چونکە ئەو یان دەمامکی شاخێکی گەورە هەڵئەداتەوه
یان چنگ ئەنێتە چنگی ڕەشەبایەکی دڕ
ئەم خۆی 'با'یەکە بە جەستە لاواز و
خەڵکی کۆڵانێکی لاتە و
نە هۆزی خەنجەری لەگەڵدایە و
نە عەشیرەتی پەیکوڵ و
نە حزبی قوڕقوشم
تاق و تەنیا وەک پەلکەگیا وایە
یاخود وەکوو پەڕەسێلکەی شیعر یان کەروێشکێکی ناو چیرۆک دێت و دەچێ
'با'یەکە هەگبەیەکی بچووکی هەوری داوە بە شانە سپییەکانیا و
خێرایەتی و کەوتۆتە ڕێ
'با'یەکە و یەک ماڵی نییە و
هەرچی ئازارە ماڵێتی
ناو بە ناوێ لە ناو ستوونی بێزاریی ڕۆژنامەیەکی ئازادا
دائەنیشێ یاخود هەڵئەسێتە سەر پێ و
لە ستوونەوە باز ئەدا و ئەچێتە ناو کوێرەوەری و ئەشکەنجەوە و
لەدواییشدا پرشنگ و باران ئەنووسێ لەم ستوونە باریکە
لەو ڕۆشنەدا بە دار و بەرد و باخچەوە
بە پاییز و بە خونچەوە
بە دارسێوی هەڵەبجەوە
هەموومان جێمان بۆتەوە
هەموو جارێ ئەو ستوونە بچکۆلەیە جادە چاوەڕوانیی ئەکات هەتاکو دێ
هەموو جارێ ئەم قەڵەمە گرێی وشەی ناو دڵی خۆی
بۆ کاغەزێ، بۆ گەڵایێ، بۆ پەپوولەیەک، عاشقێ، ئەکاتەوە و
پێیان ئەڵێ: لە ڕاستیدا من دەنووک و لەسەر و لە قەڵەمدان و لە دێڕم دڵنیا نیم
چونکە لەوانەیە ڕۆژێ لە باوەشی کاولاشێکی دوورەدەستی بێ ئەدرەسدا
یان لە سیلەی کۆڵانێکی کوێرەمووشەی ئەم شارەدا
یاخود لەسەر کورسیی خەمی چایخانەیەک
یان لە پیاسەی ئێوارەیەکی کەرکووکدا
وەختێ شیعرم وەکوو 'سۆران' تاق و تەنیا  ئەچێتەوە بۆ ماڵەوە...
یان لە ناو خواردنی پاروویەکی بەر عەرەبانەی دەستیدا...
یان ئەو وەختەی کە دەستی منداڵەکەم گرتووە و ئەیبەم بۆ شاری یاری و
بۆ سواریی کورسی
کورسی بە یەکەوە هەردووکمان ڕەوانەی قیامەت و
شاری مردنی خوا بکەن دڵنیا نیم
سەرنیا نیم...
ڕۆحنیا نیم
چونکە ئاخر سەرپەڕاندن!
لە پێچی ئەم مێژووەدا لە تەمتومانی ڕۆژە و ئەم دەورەدا لە گێژاوێکی... مەلادا
لە زریانێکی فەتوادا
سەرپەڕاندن لە تێکردنی پەرداخی ئاو سووکترە
لە گرێدانی قەیتانی قۆندەرەیەک ئاسانترە
لە بڕیاری سڕینەوەی وشەیەکیش خێراترە
ئاخر سەربڕین لە ناو ئەم حیکایەتی غەدرانەدا
لە هەڵپچڕینی سەری بۆتڵێکی بادە ڕەحەتترە!
ئەم نیشتیمانە نیوەڕۆوان کە ئەیبینی خۆیمان لێ ئەکا بە 'گاندی' و
لە شەویشدا 'بۆکاسا'یە و بە بەیانیان سۆفییەکەی نوورانیە و
ئێوارانیش جلی 'بارق' و 'حەجاج'ی لەبەردایە!
بە ڕۆژ ئەو درەختی شیعرە و بە شەو تەورە
بە ڕۆژ تیرێژی هەتاوە و بە شەوقەکەی شەوەزەنگە!]

شەوی ڕابردوو نەنووستم
ئەوەندە نانی شەل و کوێری ئەم وڵاتە یەخەی گرتم
شەوی ڕابوردوو نەنووستم
ئەوەندە سکاڵای: گەڵای غەدر لێ کراو
پۆلە چۆلەکەی برسی، پۆلە شەپۆلی تینوو
پۆلە گوڵی چاو بە فرمێسک و
ڕەوەئەسپی ماندوو هاواریان لێ کردم
"ئەو وەختەی نیشتیمان گوێ لە دارستانە غەدر لێ کراوەکان ناگرێ
ئیتر دار و بەرد بیر لە حاشاکردن ئەکەنەوە
ئەو وەختەی نیشتیمان چاوی خۆی لە ئاست ئەو هەموو لاشەی غەدرە ئەنووقێنێ
ئازارەکان بیر لە بەهارێکی سوور ئەکەنەوە
ئەو وەختەی نیشتیمان چاو لە دزەکان ئەپۆشێ
دزەکان بیر لە دزینی خودی نیشتیمان خۆی ئەکەنەوە!

ڕۆژتان باش
من ناوم قەڵەمە و لە باخەڵێکی ئەمیندام
ئێمە هەزاران هەزارین و هەموویشمان ناومان قەڵەمە
بۆ ئەوەی لە یەکتر جیامان کەیتەوە ئەبێ
یەکە یەکە تەماشای چاوی وشەکانمان و
دڵی وشەکانمان و
ڕەنگی وشەکانمان بکەیت و
لەمانەیش گرنگتر تەماشای هەنگاوەکانمان بکەیت
هەموومان ناومان قەڵەمە و بەڵام هەریەکە و لە باخەڵێکایە
قەڵەم هەیە لە باخەڵی سامانایە
قەڵەم هەیە باران پێی ئەنووسێ
قەڵەم هەیە وا لە پەنجەکانی گوڵەبەڕۆژەدا
قەڵەم هەیە بە دەستی تۆڵەوە
قەڵەم هەیە لە خێڵی خوێنە یان لە هۆزی شمشێر
قەڵەم هەیە سەری پڕە لە بەفر
قەڵەم هەیە دڵی پڕە لە پەپوولە
قەڵەم هەیە گیانی پڕە لە دڕکەزی
قەڵەم هەیە و هەیە و هەموویشیان ناویان قەڵەمە!
ئەم نیشتیمانە قەڵەمێکی هەیە چەند نووکێکی ڕەنگاڵەی پێوەیە...
بە ڕەش ئەنووسێ ئازادی مێ و بە سووری نێر ئەیکوژێنێتەوە
بە مۆر ئەنووسێ یەکسانی و بە شینی خێڵ ئەیکوژێنێتەوە
بە سەوز ئەنووسێ دادپەروەری و بە قاوەیی حیزب ئەیکوژێنێتەوە
ئەم نیشتیمانە ئەگەر زانی بەڵێنێکی داوە و بەڵام بەڵێن بۆی بووە بە لەمپەڕ
ئەوسا ئیتر ڕۆژ و مانگ و ساڵ ئەگۆڕێ و بێباک... بێباک
ناوەکەی خۆی چز ئەکات و ئیمزاکەی خۆی ئەکوژێنێتەوە!

[قەڵەمەکەم ئەم بەیانییە بەر لەوەی چۆلەکەکان لە خەو هەستن
ئەو هەستابوو
لەسەر جادە سپییەکانی کاغەزەکەی بەردەمی شپرزە و بێ ئارام لە هاتووچۆدا بوو
دەمێک خاو ئەڕۆیشت و دەمێ خێرا
هەندێ جار دائەنیشت و هەندێ جار ڕائەوەستا
قەڵەمە بە گومانەکەم پێی وتم: تۆ نازانی من چ نووکێکی دڕدۆنگ و ڕاڕام هەیە
تۆ نازانی من چەند جار ئەبێ تاقەوشەیەک ئەمدیو و ئەودیو پێ بکەم
لەمسەری خەیاڵەوە تا ئەوسەری شیعر بیهێنم و بیبەم تا بڕوای پێ بکەم
قەڵەمە بە گومانەکەم کۆمەڵێ پرسیاری لەبەردەمدا هەڵڕشتم
باشە تۆ چوویتەتە دەرەوە ناو ئەو هەموو ئاپوورەی ژان و زامانە!؟
لێت پرسیون: ئەی ئەوان ئەڵێن چی و ناڵێن چی!؟
چییان ئەوێ و چییان ناوێ!؟
بۆیە منیش هەر ئەمڕۆ لە ماڵەوە و لە کۆڵان و
لە گەڕەک لەسەر جادەکان کەوتمە پرسیار کردن و چاوپێکەوتن
بۆ ئەوەی بە زووترین کات سەرەنجامی ڕاپرسییەکان بگەیەنمەوە قەڵەمە بە گومانەکەم
لە دارتووە ماندووەکەی حەوشەکەی خۆمانەوە دەستم پێ کرد
چوومە بەردەمی، بۆی نوشتامەوە بەڵام من هێشتا دەمم نەکردبووە
بە دەنگێکی وشکەوە هاواری کرد: ئاو
چوومە لای قوڵینە پیرێژنە بێ هەناوەکەی هەیوان
هێشتا من نەموتبوو ڕۆژ باش
ئەو بە دەنگێکی لەرزۆک و کزەوە وتی: نان
پشیلە نەخۆشەکەمان خۆی هات بۆ لام و
لاملی تێ هەڵسووم و میواندی: دەرمان
پەنجەرە پیرەمێردە دەم و ددان شکاوەکەمان
مقەباکەی سەر دەم و چاوی لابرد و وتی: شووشە بۆ ڕوخسارمان
لەو دیویشەوە کۆڵانە سەرتاپا قوڕاوییەکە بە دەنگێکی باریکەوە
لە ناو لیتاوێکەوە سەری دەرهێنا و وتی: چەوولم
تابلۆی سەر ناوچەوانی قوتابخانەکەی نزیکمان
تووڕە تووڕە کەوتە تەق تەق و قیڕاندی: مامۆستا بۆ وانەکان
پۆلێ چۆلەکە بە دەم فڕینەوە هاواریان ئەکرد: هێلانە... هێلانە
ڕەوە جوانوویەک بە دەم غارەوە ئەیانحیلان: کار... کار
کۆمەڵە مەمکەمژەیەک لەبەر پەنجەرەی ژوورەکانی گەڕەکەوە ئەکڕووزانەوە و ئەیانوت: شیر... شیر
ڕەوەمامزێکیش لە ناو شیعرێکمەوە هاتنە دەرێ و
بە دەم باڕژنکردنەوە ڕوویان کردە ئەو دەشت و دەرە و
ئەیانوت: ڕووناکی
لە ناو ڕۆمانی هاوڕێیەکیشمەوە
هەرچی دار و بار و گوند و شار و شارۆچکە هەیە هەستانە سەر پێ و ئەیانوت: بەختەوەری!
وەختێ ئاوڕم دایەوە ئاپوورەیەک: لە مێروولە تا پڵنگ تا کەروێشک و
تا باڵندەکان کەوتبوونە داوم و
منیش ئەچوومەوە بۆ لای قەڵەمە بە گومانەکەم!]

ئەم نیشتیمانە پیرە ئەوەتەی هەیە ددانی بە یەک گوناهی خۆیدا نەناوە
قەت نەیوتووە: یەک جۆگەی لێڵم هەبووە یان ئاوێنەیەکی درۆزن
یەک گوڵی سیسم هەبووە یان بۆنێکی ناخۆش
یەک ئەسپی نەخۆشم ڕاگرتووە یان جارێ گلاوم
یاخود ئەو بەڵێنەم کوێر بوو
ئەو مێژووەم شەل و گێڕ بوو
نا... نا ئەم نیشتیمانە پیرە
ڕۆژێ لە ڕۆژان نە خوار و خێچ ڕۆیشتووە و
نە سەرسمێکی داوە و
نە قسەیێکی پیس و پۆخڵی کردووە!
نا... نا...
ئەو بەردەوام خودا بووە!

[من ناوم قەڵەمە و نووکێکی سەربەستم هەیە
ستوونەکەم کردووە بە بۆینباخێک و
هەموو ڕۆژێ ملی نیشتیمانی پێ ئەجەڕێنم
کردوومە بە ئاوێنە و ئەیبەمە بەردەمی بۆ ئەوەی گەڕ و گولیی ڕوخساری ببینێ
ئەیدەم لە چاوی بۆ ئەوەی بە شەوارەی شەهیدان بکەوێ]

ئەم نیشتیمانە باوکێکی ئێجگار گەوجە
گەر پانتۆڵێ بۆ کوڕەکەی خۆی بکڕێ
ئەبێ لە ڕۆژنامەدا بینووسێ و
لە 'تێ ڤێ'شدا پانتۆڵەکە نیشان بدرێ!
لە ڕادیۆا باسی بکرێ و
لە دواییشدا بکرێ بە ڕیکلام و کتێب!
گەر کراسێ بۆ کچەکەی خۆیشی بکات
ئەبێ کراسی ژنانی ئەم دنیایە پێی بزانن و
باخچەی گشتی بە هەردوو دەست هەڵیبڕێ و
لەسەر ئەم جادەی سەهۆڵەیش هەڵبواسرێ!
ئەم باوکە چەنەبازەی من
ڕۆژی دەیان جار پێم ئەڵێ: چەترێکم بۆ شیعرەکانت دروست کردووە
بۆ ئەوەی لە هاوینا سێبەریان بۆ بکات و لە زستانیشا تەڕ نەبن
جادەیەکم بۆ چیرۆکەکانت قیرتاو کردووە
بۆ ئەوەی ئیتر قاچیان لە چاڵ و چۆڵی هەڵنەنووتێ
نەخۆشخانەیەکم بۆ وشەکانت کردووەتەوە بۆ ئەوەی ئەگەر نەخۆش کەوتن
بە پەلە چارەسەر بکرێن
هەروەها چەندین مزگەوتی تازەیشم بۆ دروستکردووی تا لە خوا دوور نەکەویتەوە
گەورەترینیان ئەو مزگەوتەیە کە لووتی چۆتە ناو هۆڵی هونەرەوە و
ڕۆژی پێنج جار بەسەر مۆسیقا و گۆرانی و شیعردا ئەپژمێ و
لووتیشی بە پەردەی شانۆکە ئەسڕێ!
ئەی باوکە گەوجەکەم!
تۆ تاقەباوکی کە منەت بەسەر کوڕ و بەسەر کچت و
بەسەر شەقام و بەسەر درەخت و
بەسەر گردی زیندووان و شەهیدان و
بەسەر باخچە و بەسەر بولبول و پارکەکانی خۆتا بکەیت!

[لە بیرتە ئەو ساڵە لە جێگەی دەستێکی قرتاوت
دەستێکی دەستکردم بۆ هێنایت
باشتریش لەو دەستەی کە هەتبوو
بیرت چوو!؟
ئەو ساڵەی نەخۆشییە قورسەکەت گرتبوو
هەموو ڕۆژ چەند جارێ بە کەوچک دەرمانم ئەکردە دەمتەوە و
چەند شەویش لەسەر یەک من ئێشکی لەرز و تای تۆم گرت و ئەنووستم
پێم ناڵێی چیت هەبوو!؟
چەند قلێ لە شیعری سیسەڵەی گیرفان و
باوەشێ کتێبی ناقۆڵن و قەڵەم و لاستیکێ و لەوانە بەولاوە چیت هەبوو!؟
هەتاکو ساوایش بوویت، هەڵتەکیم، داتەکیم
ئەوەندە لەو شیری 'نیدۆ'یەم بۆ کڕیت!؟
لە بیرتە بۆ ئەوەی پێبکەنیت چی نوکتەی دنیایە بۆم کردیت!؟
لە بیرتە بۆ ئەوەی دەرکەویت کڵاو و جامانە و مشکییەکەی خۆم داگرت دامێتی... بیبەستیت
تۆ چی بوویت!؟ هیچ نەبوویت...
کیلۆیەک لە گۆشت و ئێسقانی بێکەڵک بوویت
من گەورەم کردیت و... کردمیت بە پیاو و ژیایت و نەمردیت!

بەیانیت باش  من ناوم'کەڵەشێر'ە و خەڵکی 'مەڵکەند'یم
چەندین ساڵە پاسەوانم و بەیانیان زوویش بۆ ئەم گەڕەکە ئەخوێنم
لە مێژووی ڕاژەڕبویشدا تەتەر بووم و
چەندین نامەی نەهێنیم لێرەوە گەیاندۆتە ئەشکەوتەکان
بەڵام ئێستا دەنگم نووساوە
تووتییەکی دوکتۆر پێی وتم لە گەرووتا گرێیەک دروست بووە
چارەسەرت لە دەرەوەیە
منیش چەندین سکاڵانامەم گەیاندە کەڵەشێرە گەورەکان
کەچی سەیر ئەوەیە دوێنێ دوکتۆرە تووتییەکە پێی وتم نەگبەت! تۆ وا دیارە ئاگات لە هیچ نییە
بەر لە چەند ڕۆژێ لە جێگەی تۆ مریشکێکی ساغ و سەلیم و جوانیان نارد بۆ هەندەران]

ئەم کاتەو باش
من ناوم 'کرمی ئاوریشم'ە
خەڵکی 'کوڕەکاژاو'م
خۆم و دایکم و باوکم و خوشکەکانم شەو و ڕۆژ خەریکین ئاوریشم دروست بکەین
بەڵام ڕەنج بە خەسارین
سیسارکە کەچەڵەیەکی ئەم ناوە لەگەڵ کۆمەڵێ قەلەباچکەی پۆلیسا
هەموو مانگێک ئەگەنە سەرمان و چیمان دروست کردووە ئەیپێچنەوە و
ئەیخەنە ژێر باڵیان و ئەیبەن

[مامزێکی سپی وتی: هۆ نیشتیمان لە ئێستەدا تۆ بە قەد بەڕەیەکی کۆن و دڕاو یان
ئاوێنەیەکی شکاو یان تەنەکەیەکی نەوتی بەتاڵ یان
جامێکی قوپاو و قوتیلەیەک خۆشەویست نیت
نە جارێک و نە دوو و نە سێ و نە بیست دەستی ئێمەت کردووە بە زاخی درۆکانتا
وشەی 'جوانی' نازانێ بچێ بۆ کوێ!؟
ناوێرێ بچێتە دەرێ نەبادا لە ناوی بەرن
وشەی 'هەق' بێ سەر و شوێنە و دەمێکە کەس نەیبینیوە
وشەی 'ئارام' ئەڵێ تاقەتم لێ بڕاوە
ڕەنگە لەم وڵاتەدا ئیتر ناوی خۆم بگۆڕم بە 'ناکام' بەڵام
وشەی 'غەدر' هەموو ڕۆژ لەبەر دەرکی سەرایە و
پیاسە ئەکا و پڕ بە شاریش پێئەکەنێ
کڵۆ تەباشیرێ وتی: هۆ نیشتیمان بۆ ئەوەی بە ڕاستی ببی بە نیشتیمان
ئەبێ لەسەر و ملەوە بۆ بەرەوخوار
خۆت، خۆت هەڵوەشێنیتەوە
ئەبێ بارانێکی تر لە ناوتا دا بکات و
'با'یەکی ترت تیا هەڵکا و سووتانێکی دیکەی جیاواز بتکا بە قەقنەسی چیا
نووکی قەڵەمێکیش ئەیوت: ئەی نیشتیمانە نووستووەکەم!
من دەرزیئاژنی جەستەت ئەکەم
هەتا هەڵسیتە سەرپێیان و ببی بە سێڵاو و زریان
چی پاشماوەی ئەم دیرۆکە ڕزیوەیە بە دار و پەردووی درۆوە هەمووی لەگەڵ خۆتدا بەری
بەڵام تا تۆ ئەوە نەکەیت
نە دار ئەهێڵێ بسرەوی و
نە بەرد لێت ئەگەڕێ هەناسە بدەیت و
نە ماڵ جێگەت ئەکاتەوە و نە جادەیش بە سەریا بڕوێت
ئەی نیشتیمانی بێ گوێچکە
وائەزانی ئەم تووڕەبوونە هەر تووڕەبوونی سەری خۆمە
لە پێشدا تووڕەبوونەکان لە شێوەی دڵۆپ دڵۆپی بچووکدا... چکە چکە... دائەدەن و دێنە خوارێ...
هەر دڵۆپەی لە بێزارییەکەوە
دڵۆپێک لە گەرووی شیعرێکی زیندانییەوە
یەکێکی تر لە چاوی پرسیارێکی ماندووەوە
ئەوی تر لە ژێی پچڕاوی گیتارێکەوە
ئەوی تریان لە بنج و بێخی پرچێکی بڕاوەوە
یەکێکی تر لە قیژەی گۆی مەمکێکەوە
یەکێکی تریش بە بنمیچی خەفەتێکی گەنجەوە تاد تاد تاد...
ڕەنگە ئەو دڵۆپانەیش یەکتری نەناسن
بەڵام لە دواییدا هەموو یەک ناو بۆ خۆیان هەڵئەبژێرن و ئەبن بە سێڵاو!
ئەمەی ئەینووسم شیعر نییە...
خۆڵەمێشە
چیرۆک نییە...
زوخاوڕێژە
شانۆ نییە...
دیالۆگی نێوان زامەکانە
تابلۆ نییە...
جەستەی منداڵی نەخۆشە لە باوەشی برسێتیدا

لەسەر جادەی سەهۆڵەکە ڕاوەستاوم
ئەگەرچی لێرە وەستاوم بەڵام من هەوری مەراق و
'با'ی پرسیاری ئەم وڵاتەم
هەموو ڕۆژێ چەندین کەڕەت ئەبمە هاواری غوربەت و
لە سینەتاندا هەڵئەکەم
هەموو شەوێ چەندین کەڕەت ئەبمە بارانی قەسیدە و
بەسەر خەمتاندا دائەکەم
هەموو جارێ بە خۆم و ڕەنگی شەفەش و کلووی وشە و پەپوولەکانی ڕۆحەوە
یەکە یەکە سەر لە ماڵەکانتان ئەدەم
ئەبمە مۆم و لەسەر قەراغی پەنجەرەی ڕازەکانتان خۆم هەڵئەکەم
ئەگەرچی لێرە وەستاوم بەڵام من لە لای ئێوەیشم لە هەر کوێ بن
منیش لەوێم لە ڕێ و باندا
من قاچتان و من هەنگاوی سۆراختانم و
لە سەلام و خۆشەویستیی و کارکردندا
من پەنجەکانی دەستانم و لەگەڵتانم و سێبەرتانم
بۆ منداڵان من پێکەنینی نوقڵێکم و
بۆ کوڕەکان من گۆرانی قەڵەمێکم
بۆ کچەکان لەنجە و لاری گیتارێکم و بۆ پیرەکانیش گۆچانم!
ئەگەرچی لێرە وەستاوم بەڵام چاوم وا لە چاوی هەمووتاندا و
دەنگم دەنگی کسپەتانە و ڕەنگم ڕەنگی خولیاتانە و بۆنم بۆنی سکاڵاتان!
ئەم جادەیە جادەی بە بادانی شیعرە
وەکوو بە بادانی خەم و
ئەم سەهۆڵە سەهۆڵی هەناسەی ساردی ئەو نەوڕەسانەن ئێواران مل هەڵئەسوون
لە ناکامی و لە یەکتری و عەشقیش ئەکەن بە سترانی سپی لێرە!
لەسەر جادەی سەهۆڵەکە ڕاوەستاوم
لە سێگۆشەیەکی شوومدا
ڕاوەستاوم ئاخ... ئاخ... ئاخ... ئەمڕۆ یادی نەگەڕانەوەی نەورەسێکی وێنەکێشە
یادی دوافڕینی... دوا شەقژن و باڵلێکدانی... دوا تەماشای ڕەنگەکان لێرەدا بوو
دواهێڵ و دوافیگەر و دواهەناسەی فڵچەکەی تێکەڵ بە بێدەنگی بوون
من ئێستا ئەمەوێ بە نیشتیمانی زەینکوێر بڵێم: لە بری ئەوەی تۆ ناوی ئەو هەموو
نەوڕەس و پەپوولە و باڵندە کۆچکردووانەمان بیر بخەیتەوە چەخار!
ئێمە بیرت ئەخەینەوە ناوی ئەو ئازارە لە بیرکراوانەی
ئەو پرشنگە لە بیرکراوانەی
ئەو عەشقە لە بیرکراوانەی ڕۆژانێ بوو تۆ بەوانەوە جوان بووی بەوانەوە ئەشنایتەوە...
ئەمەوێ ڕووبەڕوو پێی بڵێم: کە تۆ نەوڕەسە سەوزەکەی چاوانی خۆت بیر نەمابێ
وا باشترە هەر بە پێی خۆت بچیتە ناو ئەو دەریاچەی 'شەرمانەوە'
کە دەم و چاوت ڕشتوونی تا ئەخنکێی

لە سەرێ ڕا
لە لای خواوە لە دەربەندێکی نوورەوە بە شەو
'با'یەکی زۆر غەمبار هێواش هێواش، کزە کزە... بەرەو گۆڕستانی گەورە دائەگەڕێ و
یەکە یەکە 'لەبیرکراوان'ی ئەوێ بانگ ئەکات و
هەر هەموویان هەڵئەسێنێ و
لەگەڵ خۆیدا بەرەو دامێنی گردەکە ئەیانهێنێ و
لە بەرایی ناو تەمێکی گوڵ گوڵیدا لەگەڵیاندا دائەنیشێ و بە ئەسپایی ئەیاندوێنێ
ئێوە لە بیر دەنگ چوونەوە
ئێوە لە بیر ڕەنگ چوونەوە
لە بیر دیرۆکی مرۆڤ و لە بیر وڵات چوونەوە
بەڵام لە بیر خوا نەچوونەوە
من ماچی خوا و من باوەشی دڵنەوایی تەنیای هەموو تەنیاکان و
غەریبیی گشت غەریبانی ئەم گەردوونەم بۆ هێناون!
بیرکراوان شیعریان تیا بوو
چاوی وشەیان هەر تەڕ بوو
ئاوازیان تیا بوو
حەسرەتیان هێشتا ئەفڕی!
بیرکراوان، ئەوانە بوون بە دەم بە دەست بە هەناسە بۆ ئەوانی دی دنیایان جوانتر کرد و
بەڵام خۆیان بە تەنها هەر نێڵەنێڵی دۆزەخەکەی ژیانیان دی!
ژیانتان باش  من ناوم 'کێل'ە
کێلی گۆڕی شمشاڵێکی لە بیرکراوم
نیوەم شکاوە و بستێکم بە دەرەوە ماوە
باوەڕ ناکەم نە تۆ نە گرد و نە ئەو دارئەرخەوانانە و
نە هیچ ڕێبوارێ ئێمەیان هەر لە بیر مابێ
با بیرت بخەمەوە
ئەگەر تۆ خۆیشت نەیزانی ئەتوانی لە گومەزە گەورەکەی ئێرە بپرسی
'دایکی جەماڵ'* لە کوێد نێژراوە!؟
ئەو ڕۆژە نیشتیمان خۆی بە لامدا ڕۆیشت و
لێم هەڵنووت و کەچی نەشیوت مەرحەبا!]

دیمەنێکی شانۆیی: شوێن: سەر جادەی سەهۆڵەکە
کات: سەرلەبەیانی
دوو درەختی سەر شۆستەکە بە تەنیشت یەکەوە
لەولایشەوە پیاوێکی کەتە و چەکدار
دوورتریش کۆمەڵێ گەنج ڕاوەستاون
یەکەم درەخت ڕوو ئەکاتە دووهەم درەخت: تۆ ئەو وێنەکێشەت ئەناسی!؟
دووهەم درەخت: ئەی چۆن! کەم ڕۆژ هەبووە ئەگەر ئاو و هەوا خۆش بووبێ
سەرلەئێواران، نەهاتبێتە لامەوە و دەستێکیشی نەخستبێتە سەر شانم!
یەکەم درەخت: ئەی ئەزانی ئەمڕۆ چییە!؟
دووهەم درەخت: ئەمڕۆ ساڵیادی کۆچی سووری ئەوە!
یەکەم: لە مامزێکی سپیی ڕۆحسووک ئەچوو!
دووهەم: بەڵام خۆی سەوز بوو
یەکەم: ئەزانی لە بەردەمی مندا کەوت... ئەی تۆ ئاگات لێ نەبوو!؟
دووهەم: من چاوم لێ نەبوو
لەو کاتەدا نیشتیمان دروشمێکی پیا هەڵئەواسیم!
یەکەم: ئەی وێنەکانیت دیبوو!؟
دووهەم: هەندێکیان. چەند جارێک لەبەر چاوی من تابلۆکانی نیشانی هاوڕێکانی ئەدا...
ئەمە بەرلەوەی لە دواییدا لە مۆزەخانەکەی ئەوبەرەوە پێشانگایان بۆ بکاتەوە!
یەکەم: جاربەجار وێنەی ئێمەیشی ئەکێشا
دووهەم: بەڵام وەکو وێنەکێشە کۆنەکان نا... نا
ئەو وێنەی ڕۆحمانی ئەکێشا نەک ڕواڵەتمان
یەکەم: ڕاستە. ڕۆژێک نیشتیمان لای منەوە ڕاوەستابوو ئەیوت: من لەو وێنانە تێناگەم
دووهەم: ئینجا ئەو لە چی ئەگات!
یەکەم: وا خۆیشی بەرەو ئێرە هات
نیشتیمان لە شێوەی پیاوە کەتە و چەکدارەکەدا دێتە لایانەوە و ئەوەستێ
نیشتیمان: ئەوە چییە وا سەرتان ناوە بە سەری یەکەوە!؟
یەکەم: باسی ئەو وێنەکێشە ئەکەین کە لە ڕووداوێکی شوومی ئوتومبیلا لێرەدا کەوت بە دەما
نیشتیمان: ئا... ئا... شتێکی وام لە بیرە!
دووهەم: ئەتناسی؟
نیشتیمان: ئەی چۆن... ئەی چۆن... ئێ سەردار سەوز ناڵێن!؟
یەکەم: 'پێئەکەنێ' دە فەرموو! سەرداری چی!؟
سەروەت... سەروەت
نیشتیمان: ئا... ئا... نا... ببوورن... بە ڕاستی ئەوەنە سەرم قاڵە
خەریکم ناوی خۆیشم بیر ئەچێتەوە
دووهەم: ئەی وێنەکانیت دیبوون!؟ بە لاتەوە چۆن بوون!؟
نیشتیمان: بە ڕاستی زۆر کەم. بەڵام من تێیان نەئەگەیشتم
(بە پێکەنینەوە) جارێکیان وێنەی پیاوێکی نیشاندام
سێ چوار دەم و چاوی هەبوو...
ئاخر مرۆڤ چۆن سێ دەم و چاوی هەیە!؟ ها... وا نییە!؟
دووهەم: بۆ نا!؟ ئێمە ڕۆژانە تۆ ئەبینین لە سێ چوار دەم و چاو زیاتریشت هەیە!
یەکەم: ئەمە ڕاستە
من ئەو ڕۆژە لە کردنەوەی بازاڕێکی گەورەدا تۆم بینی چوار دەم و چاوت هەبوو
دەم و چاوێکی کوردی و یەکێکی تورکی و یەکێکی فارسی و یەکێکی عەرەبی
نیشتیمان: شتی وا نییە. ئەوە هەر چاوی ئێوە وام ئەبینن!
دووهەم: ئەو ڕۆژە هەر لێرەدا بوو باسی بەڵێندەرێکی دەوڵەمەندی ئەم شارە کرا...
تۆ ناوی خۆی و باو و باپیری و ڕەچەڵەکیت هەر هەموویت ئەزانی، لەبەرت بوون
تەنانەت ناوی دایکی و نەنکی نەنکیشی... کەچی...
(یەکەم بۆی تەواو ئەکات) کەچی ناوی شەقامێکی گەورەی ناو دنیای هونەری ئەم شارە نازانی!؟
(نیشتیمان: ئەشڵەژێ) سەرقاڵی... سەرقاڵی...
ببوورن ببوورن... من ئەبێ بڕۆم...
چونکە تۆزێکی تر پێویستە بەردی بناغەی "کۆمپانیای ئازادی" دابنێم (ئەڕوات)
دووەم: توخوا ئەمە نیشتیمانە!؟ یان موقاویل!؟
یەکەم: باشتر با بڕوات!
دووەم: ئای کە ڕۆژێکی غەمگینە... ڕۆژێکی ڕەنگ خۆڵەمێشیی...
یەکەم: چ زیانێکی گەورە بوو!؟ بۆ ئەم شەقامە و بۆ ئێمەو بۆ هونەر و بۆ جوانی و بۆ هەموو دنیایش!
دووهەم: ئەی ئێمە ئەمڕۆ چی بکەین!؟
یەکەم: سەرلەئێوارەو هەر لێرەدا ساڵیادێکی گەورەی بۆ ئەگێڕین...
ئەو گەنجانەیش هەر هەموویان لەگەڵمانن...
دووهەم: من بە نیازم پەخشانێکی بە گەڵاوەریوەکانم بۆ بنووسم!
یەکەم: من شیعرێکم بۆ نووسیوە. درێژ نییە...
ئەگەر بێزارت نەکەم هەر ئیسا حەزئەکەم بۆت بخوێنمەوە!
دووهەم: بە گوێچکەی دڵی هەموو گەڵا و پژوپۆیەکم گوێت لێ ئەگرم
یەکەم: شیعرەکە ئەخوێنێتەوە. گەنجەکانیش دێنە لایەوەو ئەوانیش گوێ ئەگرن

[لە دامێنی وەنەوشەیی ئەم خەمەدا... ئەمڕۆ چڵ و لق و گەڵام هەر هەموویان یەکە یەکە و گۆپکە... گۆپکە خۆیان بە زەرد داپۆشیوە و چاویان پڕ لە ئەسرین سەوزە! ئەی 'با'ی حەسرەت خێرا وەرە و ... بگەرە لام بۆ سەمایەکی دۆزەخین دەسم بگرە و تا سووتانی بەردەم خودا بمڕفێنە و هەر لەوێدا بە پەڕەمووچی عەشقێکی تاق و تەنیا کڵپە ... کڵپە لە ناو کۆتەڵێکی شیند وێنەی مامزێ بکێشە کە لە وڵاتی چەقۆدا زۆر کەم ژیا! ئەی 'با'ی حەسرەت سەما، سەما، سەما، سەما بە دەوری ئەو مامزەدا بە دەوری ئەو ئەوینەدا و  لەگەڵ مەرگێکی تەنیادا سەما و سەما ئەی 'با'ی حەسرەت تۆ ماندوویش بی، ماندوو نابم لەبەر ئەوەی ئەم سەمایە  سەمای ئەبەدیی عەشقێکە هەتا ڕەنگەکان بمێنن دوایی نایە (کۆتایی شانۆنامە)]

[emro nîştîman leser cadey seholeke xoy kirdibû be firîşte û
Demamkî yekêk le pakîzekanî bestibû
Le pirêkda jinêkî reqeley reştaley naw enfal hat û
Be dû pence demamkî xiste xwarê û
Ewsa îtir le herdû çawî û
Herdû kunelûtî û demyewe
Topel topel, kirim û qalonçe û sîsirk û mile û hezarpêkan hatne derê!
Beyanît baş min nawim 'qelem'e
Le naw pencekanî 'ba'yekî genicdam
Xawenekem hemîşe hetawim pê enûsêtewe
Ew sil le hîç tarmayye û
Lastîkêkî xetkujanewey miqestekan nakatewe
Min hendê car ke ew pêm enûsêt dilim ekewête xurpexurp
Nayşîşarmewe etirsim!
Çunke ew yan demamkî şaxêkî gewre hel’edatewh
Yan çing enête çingî reşebayekî dir
Em xoy 'ba'yeke be ceste lawaz û
Xelkî kolanêkî late û
Ne hozî xencerî legeldaye û
Ne ’eşîretî peykul û
Ne hizbî qurquşim
Taq û tenya wek pelkegya waye
Yaxud wekû peresêlkey şî’ir yan kerwêşkêkî naw çîrok dêt û deçê
'ba'yeke hegbeyekî biçûkî hewrî dawe be şane sipîyekanya û
Xêrayetî û kewtote rê
'ba'yeke û yek malî nîye û
Herçî azare malêtî
Naw be nawê le naw sitûnî bêzarîy rojnameyekî azada
Da’enîşê yaxud hel’esête ser pê û
Le sitûnewe baz eda û eçête naw kwêrewerî û eşkencewe û
Ledwayîşda pirşing û baran enûsê lem sitûne barîke
Lew roşneda be dar û berd û baxçewe
Be payîz û be xunçewe
Be darsêwî helebcewe
Hemûman cêman botewe
Hemû carê ew sitûne biçkoleye cade çawerwanîy ekat hetaku dê
Hemû carê em qeleme girêy wişey naw dilî xoy
Bo kaxezê, bo gelayê, bo pepûleyek, ’aşiqê, ekatewe û
Pêyan elê: le rastîda min denûk û leser û le qelemdan û le dêrim dilnya nîm
Çunke lewaneye rojê le baweşî kawlaşêkî dûredestî bê edresda
Yan le sîley kolanêkî kwêremûşey em şareda
Yaxud leser kursîy xemî çayxaneyek
Yan le pyasey êwareyekî kerkûkda
Wextê şî’irim wekû 'soran' taq û tenya eçêtewe bo malewe...
Yan le naw xwardinî parûyekî ber ’erebaney destîda...
Yan ew wextey ke destî mindalekem girtuwe û eybem bo şarî yarî û
Bo swarîy kursî
Kursî be yekewe herdûkman rewaney qyamet û
Şarî mirdinî xwa biken dilnya nîm
Sernya nîm...
Rohnya nîm
Çunke axir serperandin!
Le pêçî em mêjuweda le temtumanî roje û em dewreda le gêjawêkî... melada
Le ziryanêkî fetwada
Serperandin le têkirdinî perdaxî aw sûktire
Le girêdanî qeytanî qondereyek asantire
Le biryarî sirînewey wişeyekîş xêratre
Axir serbirîn le naw em hîkayetî xedraneda
Le helpiçrînî serî botlêkî bade rehettire!
Em nîştîmane nîwerowan ke eybînî xoyman lê eka be 'gandî' û
Le şewîşda 'bokasa'ye û be beyanyan sofîyekey nûranye û
Êwaranîş cilî 'barq' û 'hecac'y leberdaye!
Be roj ew dirextî şî’re û be şew tewre
Be roj tîrêjî hetawe û be şewqekey şewezenge!]

Şewî rabirdû nenûstim
Ewende nanî şel û kwêrî em wilate yexey girtim
Şewî raburdû nenûstim
Ewende sikalay: gelay xedir lê kiraw
Pole çolekey birsî, pole şepolî tînû
Pole gulî çaw be firmêsk û
Rewe’espî mandû hawaryan lê kirdim
"ew wextey nîştîman gwê le daristane xedir lê kirawekan nagrê
Îtir dar û berd bîr le haşakirdin ekenewe
Ew wextey nîştîman çawî xoy le ast ew hemû laşey xedre enûqênê
Azarekan bîr le beharêkî sûr ekenewe
Ew wextey nîştîman çaw le dizekan epoşê
Dizekan bîr le dizînî xudî nîştîman xoy ekenewe!

Rojtan baş
Min nawim qeleme û le baxelêkî emîndam
Ême hezaran hezarîn û hemuwîşman nawman qeleme
Bo ewey le yektir cyaman keytewe ebê
Yeke yeke temaşay çawî wişekanman û
Dilî wişekanman û
Rengî wişekanman bikeyt û
Lemaneyş giringitir temaşay hengawekanman bikeyt
Hemûman nawman qeleme û belam heryeke û le baxelêkaye
Qelem heye le baxelî samanaye
Qelem heye baran pêy enûsê
Qelem heye wa le pencekanî guleberojeda
Qelem heye be destî tolewe
Qelem heye le xêlî xwêne yan le hozî şimşêr
Qelem heye serî pire le befir
Qelem heye dilî pire le pepûle
Qelem heye gyanî pire le dirkezî
Qelem heye û heye û hemuwîşyan nawyan qeleme!
Em nîştîmane qelemêkî heye çend nûkêkî rengaley pêweye...
Be reş enûsê azadî mê û be sûrî nêr eykujênêtewe
Be mor enûsê yeksanî û be şînî xêl eykujênêtewe
Be sewz enûsê dadperwerî û be qaweyî hîzb eykujênêtewe
Em nîştîmane eger zanî belênêkî dawe û belam belên boy buwe be lemper
Ewsa îtir roj û mang û sal egorê û bêbak... bêbak
Nawekey xoy çiz ekat û îmzakey xoy ekujênêtewe!

[qelemekem em beyanîye ber lewey çolekekan le xew hestin
Ew hestabû
Leser cade sipîyekanî kaxezekey berdemî şipirze û bê aram le hatûçoda bû
Demêk xaw eroyşit û demê xêra
Hendê car da’enîşt û hendê car ra’ewesta
Qeleme be gumanekem pêy witim: to nazanî min çi nûkêkî dirdong û raram heye
To nazanî min çend car ebê taqewşeyek emdîw û ewdîw pê bikem
Lemserî xeyalewe ta ewserî şî’ir bîhênim û bîbem ta birway pê bikem
Qeleme be gumanekem komelê pirsyarî leberdemda helrişitim
Başe to çûytete derewe naw ew hemû apûrey jan û zamane!?
Lêt pirsîwin: ey ewan elên çî û nalên çî!?
Çîyan ewê û çîyan nawê!?
Boye minîş her emro le malewe û le kolan û
Le gerek leser cadekan kewtime pirsyar kirdin û çawpêkewtin
Bo ewey be zûtrîn kat serencamî rapirsîyekan bigeyenmewe qeleme be gumanekem
Le dartuwe manduwekey hewşekey xomanewe destim pê kird
Çûme berdemî, boy nuştamewe belam min hêşta demim nekirdibuwe
Be dengêkî wişkewe hawarî kird: aw
Çûme lay qulîne pîrêjne bê henawekey heywan
Hêşta min nemutbû roj baş
Ew be dengêkî lerzok û kizewe witî: nan
Pişîle nexoşekeman xoy hat bo lam û
Lamlî tê helsûm û mîwandî: derman
Pencere pîremêrde dem û didan şikawekeman
Miqebakey ser dem û çawî labird û witî: şûşe bo ruxsarman
Lew dîwîşewe kolane sertapa qurawîyeke be dengêkî barîkewe
Le naw lîtawêkewe serî derhêna û witî: çewwilim
Tabloy ser nawçewanî qutabxanekey nizîkman
Tûre tûre kewte teq teq û qîrandî: mamosta bo wanekan
Polê çoleke be dem firînewe hawaryan ekird: hêlane... hêlane
Rewe cwanûyek be dem xarewe eyanhîlan: kar... kar
Komele memkemjeyek leber pencerey jûrekanî gerekewe ekrûzanewe û eyanut: şîr... şîr
Rewemamzêkîş le naw şî’rêkmewe hatne derê û
Be dem barjinkirdinewe rûyan kirde ew deşt û dere û
Eyanut: rûnakî
Le naw romanî hawrêyekîşmewe
Herçî dar û bar û gund û şar û şaroçke heye hestane ser pê û eyanut: bextewerî!
Wextê awrim dayewe apûreyek: le mêrûle ta piling ta kerwêşk û
Ta balindekan kewtibûne dawim û
Minîş eçûmewe bo lay qeleme be gumanekem!]

Em nîştîmane pîre ewetey heye didanî be yek gunahî xoyda nenawe
Qet neywituwe: yek cogey lêlim hebuwe yan awêneyekî dirozin
Yek gulî sîsim hebuwe yan bonêkî naxoş
Yek espî nexoşim ragirtuwe yan carê gilawim
Yaxud ew belênem kwêr bû
Ew mêjuwem şel û gêr bû
Na... na em nîştîmane pîre
Rojê le rojan ne xwar û xêç royştuwe û
Ne sersimêkî dawe û
Ne qiseyêkî pîs û poxlî kirduwe!
Na... na...
Ew berdewam xuda buwe!

[min nawim qeleme û nûkêkî serbestim heye
Sitûnekem kirduwe be boynbaxêk û
Hemû rojê milî nîştîmanî pê ecerênim
Kirdûme be awêne û eybeme berdemî bo ewey ger û gulîy ruxsarî bibînê
Eydem le çawî bo ewey be şewarey şehîdan bikewê]

Em nîştîmane bawkêkî êcgar gewce
Ger pantolê bo kurekey xoy bikrê
Ebê le rojnameda bînûsê û
Le 'tê vê'şida pantoleke nîşan bidrê!
Le ڕادیۆا basî bikirê û
Le dwayîşda bikirê be rîklam û kitêb!
Ger kirasê bo kiçekey xoyşî bikat
Ebê kirasî jinanî em dinyaye pêy bizanin û
Baxçey giştî be herdû dest helîbrê û
Leser em cadey seholeyş helbiwasrê!
Em bawke çenebazey min
Rojî deyan car pêm elê: çetrêkim bo şî’rekanit dirust kirduwe
Bo ewey le hawîna sêberyan bo bikat û le zistanîşa ter nebin
Cadeyekim bo çîrokekanit qîrtaw kirduwe
Bo ewey îtir qaçyan le çal û çolî helnenûtê
Nexoşxaneyekim bo wişekanit kirduwetewe bo ewey eger nexoş kewtin
Be pele çareser bikirên
Herweha çendîn mizgewtî tazeyşim bo dirustikirdûy ta le xwa dûr nekewîtewe
Gewretrînyan ew mizgewteye ke lûtî çote naw holî hunerewe û
Rojî pênc car beser mosîqa û goranî û şî’irda epjimê û
Lûtîşî be perdey şanoke esrê!
Ey bawke gewcekem!
To taqebawkî ke minet beser kur û beser kiçit û
Beser şeqam û beser dirext û
Beser girdî zînduwan û şehîdan û
Beser baxçe û beser bulbul û parkekanî xota bikeyt!

[le bîrte ew sale le cêgey destêkî qirtawit
Destêkî destikirdim bo hênayt
Baştirîş lew destey ke hetbû
Bîrit çû!?
Ew saley nexoşîye qurseket girtibû
Hemû roj çend carê be kewiçk dermanim ekirde demtewe û
Çend şewîş leser yek min êşkî lerz û tay tom girt û enûstim
Pêm nalêy çît hebû!?
Çend qilê le şî’rî sîseley gîrfan û
Baweşê kitêbî naqoln û qelem û lastîkê û lewane bewlawe çît hebû!?
Hetaku sawayş bûyt, heltekîm, datekîm
Ewende lew şîrî 'nîdo'yem bo kirît!?
Le bîrte bo ewey pêbkenît çî nuktey dinyaye bom kirdît!?
Le bîrte bo ewey derkewît kilaw û camane û mişkîyekey xom dagirt damêtî... bîbestît
To çî bûyt!? hîç nebûyt...
Kîloyek le goşt û êsqanî bêkelk bûyt
Min gewrem kirdît û... kirdimît be pyaw û jyayit û nemirdît!

Beyanît baş min nawim'keleşêr'e û xelkî 'melkend'yim
Çendîn sale pasewanim û beyanyan zûyş bo em gereke exwênim
Le mêjûy rajerbiwîşda teter bûm û
Çendîn namey nehênîm lêrewe geyandote eşkewtekan
Belam êsta dengim nûsawe
Tûtîyekî duktor pêy witim le gerûta girêyek dirust buwe
Çareserit le dereweye
Minîş çendîn sikalanamem geyande keleşêre gewrekan
Keçî seyr eweye dwênê duktore tûtîyeke pêy witim negbet! to wa dyare agat le hîç nîye
Ber le çend rojê le cêgey to mirîşkêkî sax û selîm û cwanyan nard bo henderan]

Em katew baş
Min nawim 'kirmî awrîşim'e
Xelkî 'kurekajaw'm
Xom û daykim û bawkim û xuşkekanim şew û roj xerîkîn awrîşim dirust bikeyn
Belam renc be xesarîn
Sîsarke keçeleyekî em nawe legel komelê qelebaçkey polîsa
Hemû mangêk egene serman û çîman dirust kirduwe eypêçnewe û
Eyxene jêr balyan û eyben

[mamzêkî sipî witî: ho nîştîman le êsteda to be qed bereyekî kon û diraw yan
Awêneyekî şikaw yan tenekeyekî newtî betal yan
Camêkî qupaw û qutîleyek xoşewîst nît
Ne carêk û ne dû û ne sê û ne bîst destî êmet kirduwe be zaxî dirokanta
Wişey 'cwanî' nazanê biçê bo kwê!?
Nawêrê biçête derê nebada le nawî berin
Wişey 'heq' bê ser û şwêne û demêke kes neybînîwe
Wişey 'aram' elê taqetim lê birawe
Renge lem wilateda îtir nawî xom bigorim be 'nakam' belam
Wişey 'xedir' hemû roj leber derkî seraye û
Pyase eka û pir be şarîş pê’ekenê
Kilo tebaşîrê witî: ho nîştîman bo ewey be rastî bibî be nîştîman
Ebê leser û milewe bo berewxiwar
Xot, xot helweşênîtewe
Ebê baranêkî tir le nawta da bikat û
'ba'yekî tirit tya helka û sûtanêkî dîkey cyawaz bitka be qeqnesî çya
Nûkî qelemêkîş eyut: ey nîştîmane nûstuwekem!
Min derzî’ajnî cestet ekem
Heta helsîte serpêyan û bibî be sêlaw û ziryan
Çî paşmawey em dîroke rizîweye be dar û perdûy dirowe hemûy legel xotda berî
Belam ta to ewe nekeyt
Ne dar ehêlê bisrewî û
Ne berd lêt egerê henase bideyt û
Ne mal cêget ekatewe û ne cadeyş be serya birwêt
Ey nîştîmanî bê gwêçke
Wa’ezanî em tûrebûne her tûrebûnî serî xome
Le pêşda tûrebûnekan le şêwey dilop dilopî biçûkda... çike çike... da’eden û dêne xwarê...
Her dilopey le bêzarîyekewe
Dilopêk le gerûy şî’rêkî zîndanîyewe
Yekêkî tir le çawî pirsyarêkî manduwewe
Ewî tir le jêy piçrawî gîtarêkewe
Ewî tiryan le binc û bêxî pirçêkî birawewe
Yekêkî tir le qîjey goy memkêkewe
Yekêkî tirîş be binmîçî xefetêkî gencewe tad tad tad...
Renge ew dilopaneyş yektirî nenasin
Belam le dwayîda hemû yek naw bo xoyan hel’ebjêrin û ebin be sêlaw!
Emey eynûsim şî’ir nîye...
Xolemêşe
Çîrok nîye...
Zuxawrêje
Şano nîye...
Dyalogî nêwan zamekane
Tablo nîye...
Cestey mindalî nexoşe le baweşî birsêtîda

Leser cadey seholeke rawestawim
Egerçî lêre westawim belam min hewrî meraq û
'ba'y pirsyarî em wilatem
Hemû rojê çendîn keret ebme hawarî xurbet û
Le sînetanda hel’ekem
Hemû şewê çendîn keret ebme baranî qesîde û
Beser xemtanda da’ekem
Hemû carê be xom û rengî şefeş û kilûy wişe û pepûlekanî rohewe
Yeke yeke ser le malekantan edem
Ebme mom û leser qeraxî pencerey razekantan xom hel’ekem
Egerçî lêre westawim belam min le lay êweyşim le her kwê bin
Minîş lewêm le rê û banda
Min qaçtan û min hengawî soraxtanim û
Le selam û xoşewîstîy û karkirdinda
Min pencekanî destanim û legeltanim û sêbertanim
Bo mindalan min pêkenînî nuqlêkim û
Bo kurekan min goranî qelemêkim
Bo kiçekan lence û larî gîtarêkim û bo pîrekanîş goçanim!
Egerçî lêre westawim belam çawim wa le çawî hemûtanda û
Dengim dengî kispetane û rengim rengî xulyatane û bonim bonî sikalatan!
Em cadeye cadey be badanî şî’re
Wekû be badanî xem û
Em sehole seholî henasey sardî ew newresanen êwaran mil hel’esûn
Le nakamî û le yektirî û ’eşqîş eken be sitranî sipî lêre!
Leser cadey seholeke rawestawim
Le sêgoşeyekî şûmda
Rawestawim ax... ax... ax... emro yadî negeranewey newresêkî wênekêşe
Yadî dwafrînî... dwa şeqjin û ballêkdanî... dwa temaşay rengekan lêreda bû
Dwahêl û dwafîger û dwahenasey filçekey têkel be bêdengî bûn
Min êsta emewê be nîştîmanî zeynkiwêr bilêm: le birî ewey to nawî ew hemû
Newres û pepûle û balinde koçkirduwaneman bîr bixeytewe çexar!
Ême bîrit exeynewe nawî ew azare le bîrkirawaney
Ew pirşinge le bîrkirawaney
Ew ’eşqe le bîrkirawaney rojanê bû to bewanewe cwan bûy bewanewe eşnaytewe...
Emewê rûberû pêy bilêm: ke to newrese sewzekey çawanî xot bîr nemabê
Wa baştire her be pêy xot biçîte naw ew deryaçey 'şermanewe'
Ke dem û çawit riştûnî ta exnikêy

Le serê ra
Le lay xwawe le derbendêkî nûrewe be şew
'ba'yekî zor xembar hêwaş hêwaş, kize kize... berew goristanî gewre da’egerê û
Yeke yeke 'lebîrkirawan'y ewê bang ekat û
Her hemûyan hel’esênê û
Legel xoyda berew damênî girdeke eyanhênê û
Le berayî naw temêkî gul gulîda legelyanda da’enîşê û be espayî eyandiwênê
Êwe le bîr deng çûnewe
Êwe le bîr reng çûnewe
Le bîr dîrokî mirov û le bîr wilat çûnewe
Belam le bîr xwa neçûnewe
Min maçî xwa û min baweşî dilnewayî tenyay hemû tenyakan û
Xerîbîy gişt xerîbanî em gerdûnem bo hênawin!
Bîrkirawan şî’ryan tya bû
Çawî wişeyan her ter bû
Awazyan tya bû
Hesretyan hêşta efrî!
Bîrkirawan, ewane bûn be dem be dest be henase bo ewanî dî dinyayan cwantir kird û
Belam xoyan be tenha her nêlenêlî dozexekey jyanyan dî!
Jyantan baş min nawim 'kêl'e
Kêlî gorî şimşalêkî le bîrkirawim
Nîwem şikawe û bistêkim be derewe mawe
Bawer nakem ne to ne gird û ne ew dar’erxewanane û
Ne hîç rêbwarê êmeyan her le bîr mabê
Ba bîrit bixemewe
Eger to xoyşit neyzanî etwanî le gumeze gewrekey êre bipirsî
'daykî cemal'* le kwêd nêjrawe!?
Ew roje nîştîman xoy be lamda royşit û
Lêm helnût û keçî neşîwit merheba!]

Dîmenêkî şanoyî: şwên: ser cadey seholeke
Kat: serlebeyanî
Dû dirextî ser şosteke be tenîşt yekewe
Lewlayşewe pyawêkî kete û çekdar
Dûrtirîş komelê genc rawestawin
Yekem dirext rû ekate dûhem dirext: to ew wênekêşet enasî!?
Dûhem dirext: ey çon! kem roj hebuwe eger aw û hewa xoş bûbê
Serle’êwaran, nehatbête lamewe û destêkîşî nexsitibête ser şanim!
Yekem dirext: ey ezanî emro çîye!?
Dûhem dirext: emro salyadî koçî sûrî ewe!
Yekem: le mamzêkî sipîy rohsûk eçû!
Dûhem: belam xoy sewz bû
Yekem: ezanî le berdemî minda kewt... ey to agat lê nebû!?
Dûhem: min çawim lê nebû
Lew kateda nîştîman diruşmêkî pya hel’ewasîm!
Yekem: ey wênekanît dîbû!?
Dûhem: hendêkyan. çend carêk leber çawî min tablokanî nîşanî hawrêkanî eda...
Eme berlewey le dwayîda le mozexanekey ewberewe pêşangayan bo bikatewe!
Yekem: carbecar wêney êmeyşî ekêşa
Dûhem: belam weku wênekêşe konekan na... na
Ew wêney rohmanî ekêşa nek rwaletman
Yekem: raste. rojêk nîştîman lay minewe rawestabû eyut: min lew wênane tênagem
Dûhem: înca ew le çî egat!
Yekem: wa xoyşî berew êre hat
Nîştîman le şêwey pyawe kete û çekdarekeda dête layanewe û ewestê
Nîştîman: ewe çîye wa sertan nawe be serî yekewe!?
Yekem: basî ew wênekêşe ekeyn ke le rûdawêkî şûmî utumbîla lêreda kewt be dema
Nîştîman: a... a... şitêkî wam le bîre!
Dûhem: etnasî?
Nîştîman: ey çon... ey çon... ê serdar sewz nalên!?
Yekem: 'pê’ekenê' de fermû! serdarî çî!?
Serwet... serwet
Nîştîman: a... a... na... bibûrin... be rastî ewene serim qale
Xerîkim nawî xoyşim bîr eçêtewe
Dûhem: ey wênekanît dîbûn!? be latewe çon bûn!?
Nîştîman: be rastî zor kem. belam min têyan ne’egeyştim
(be pêkenînewe) carêkyan wêney pyawêkî nîşandam
Sê çwar dem û çawî hebû...
Axir mirov çon sê dem û çawî heye!? ha... wa nîye!?
Dûhem: bo na!? ême rojane to ebînîn le sê çwar dem û çaw zyatrîşt heye!
Yekem: eme raste
Min ew roje le kirdinewey bazarêkî gewreda tom bînî çwar dem û çawit hebû
Dem û çawêkî kurdî û yekêkî turkî û yekêkî farsî û yekêkî ’erebî
Nîştîman: şitî wa nîye. ewe her çawî êwe wam ebînin!
Dûhem: ew roje her lêreda bû basî belênderêkî dewlemendî em şare kira...
To nawî xoy û baw û bapîrî û reçelekît her hemûyt ezanî, leberit bûn
Tenanet nawî daykî û nenkî nenkîşî... keçî...
(yekem boy tewaw ekat) keçî nawî şeqamêkî gewrey naw dinyay hunerî em şare nazanî!?
(nîştîman: eşlejê) serqalî... serqalî...
Bibûrin bibûrin... min ebê birom...
Çunke tozêkî tir pêwîste berdî binaxey "kompanyay azadî" dabnêm (erwat)
Duwem: tuxwa eme nîştîmane!? yan muqawîl!?
Yekem: baştir ba birwat!
Duwem: ay ke rojêkî xemgîne... rojêkî reng xolemêşîy...
Yekem: çi zyanêkî gewre bû!? bo em şeqame û bo êmew bo huner û bo cwanî û bo hemû dinyayş!
Dûhem: ey ême emro çî bikeyn!?
Yekem: serle’êwarew her lêreda salyadêkî gewrey bo egêrîn...
Ew gencaneyş her hemûyan legelmanin...
Dûhem: min be nyazim pexşanêkî be gelawerîwekanim bo binûsim!
Yekem: min şî’rêkim bo nûsîwe. dirêj nîye...
Eger bêzarit nekem her îsa hez’ekem bot bixiwênmewe!
Dûhem: be gwêçkey dilî hemû gela û pijupoyekim gwêt lê egirim
Yekem: şî’reke exwênêtewe. gencekanîş dêne layewew ewanîş gwê egirin

[le damênî wenewşeyî em xemeda... emro çil û liq û gelam her hemûyan yeke yeke û gopke... gopke xoyan be zerd dapoşîwe û çawyan pir le esrîn sewze! ey 'ba'y hesret xêra were û ... bigere lam bo semayekî dozexîn desim bigre û ta sûtanî berdem xuda bimrifêne û her lewêda be peremûçî ’eşqêkî taq û tenya kilpe ... kilpe le naw kotelêkî şînd wêney mamzê bikêşe ke le wilatî çeqoda zor kem jya! ey 'ba'y hesret sema, sema, sema, sema be dewrî ew mamzeda be dewrî ew ewîneda û legel mergêkî tenyada sema û sema ey 'ba'y hesret to mandûyş bî, mandû nabim leber ewey em semaye semay ebedîy ’eşqêke heta rengekan bimênin dwayî naye (kotayî şanoname)]