خورپەی دڵ

من بە خورپەی دڵ دەزانم هەستی پێی جانانە دێ
خۆشەویستی کاری خۆی کرد، شەم لە دووی پەروانە دێ
سەیرە پێم، من بۆ بە گۆشەی چاوی نەشئە دەمگرێ
حاڵەتی وا چون هەمیشە هەر لە دووی پەیمانە دێ

گەر پەرێشانم دەبینی* ساقی نازی کەمترە
بۆیە بەینێکە وەباڵ بەستۆم، ئەویش پیاوانە دێ
لێی گەڕێ توخوا شەماڵیش بۆنی کەزیەت هەڵمژێ
گرژ و تووڕە جاربەجارێ گەر لە داخی شانە دێ

چاوی مەستت بێ هەموو شت کێشە دەفرۆشێ بەڵام
ئاگری فیتنە لە گۆڕی ئەو کل و کلدانە دێ
من لە دەس مەستی پەنام بۆ خانەقا برد، دەمدی شێخ
ئاوەدان بێ وردە وردە وا لە لای مەیخانە دێ

ماچی لێوت گەر بە نرخی گیانی شیرین دەس کەوێ
کێ هەیە* گیانی بوێ، فەرزانە دێ، دێوانە دێ
خاڵی پیرۆزەت خواپێیداوە* وا باش کەوتووە
هیچ بە خۆیدا نایە ئەمما هێندە لەو لێوانە دێ
«هێدی» لێم نەگری وڕێنە ئەوڕۆ، مەرجی ئێمە بێ
دەرد ئەگەر دەردی ئەڤین بوو، واژە هەر شێتانە دێ

Min be xurpey dil dezanim hestî pêy canane dê
Xoşewîstî karî xoy kird, şem le dûy perwane dê
Seyre pêm, min bo be goşey çawî neş’e demgirê
Haletî wa çun hemîşe her le dûy peymane dê

Ger perêşanim debînî* saqî nazî kemtire
Boye beynêke webal bestom, ewîş pyawane dê
Lêy gerê tuxwa şemalîş bonî kezyet helmijê
Girj û tûre carbecarê ger le daxî şane dê

Çawî mestit bê hemû şit kêşe defroşê belam
Agirî fîtne le gorî ew kil û kildane dê
Min le des mestî penam bo xaneqa bird, demdî şêx
Awedan bê wirde wirde wa le lay meyxane dê

Maçî lêwit ger be nirxî gyanî şîrîn des kewê
Kê heye* gyanî bwê, ferzane dê, dêwane dê
Xalî pîrozet xwapêydawe* wa baş kewtuwe
Hîç be xoyda naye emma hênde lew lêwane dê
«hêdî» lêm negrî wirêne ewro, mercî ême bê
Derd eger derdî evîn bû, waje her şêtane dê