لە سایەی ماچی لێوت

لە سایەی ماچی لێوت مەیلی عەنناب و شەکەر ناکەم
کە ڕووی تۆ دەرکەوێ قەت ڕوو لە ڕووی شەمس و قەمەر ناکەم

ئەگەر بێت و گەدایی کۆیی دڵدارم بە قیسمەت بێ
بە دڵ یادی شەهنشاهی و سوپاهـ و کەڕڕوفەڕ ناکەم

خوا بیکا ئەگەر ڕۆژێ قەدەم بێنێتە سەر چاوم
تەنەززول بۆ جەواهیرسورمە و کوحلولبەسەر ناکەم

بە تیغی ئەبرووانی خۆی ئیشارەی کرد کە بۆ قەتڵم
لەبەر ئەو موژدە ئەسڵەن مەیلی قەڵغان و سوپەر ناکەم

قەلەندەر مەشرەبی و دێوانەیی خۆشە لە دنیادا
بە فەقری خۆم ڕەزام ئەسڵەن خەیاڵی زیو و زەڕ ناکەم

نزیکیی پیاوی ئەحمەق باعیسی فەوتانی ئینسانە
هەتا عومرم ببێ قەت من ڕەفیقیی پیاوی کەر ناکەم

کە من مائیل بە خێرم خیلقەتەن ئەحمەد بەخۆڕایی
وەکوو ئینسانی جاهیل مەیلی فیتنە و شۆڕ و شەڕ ناکەم

Le sayey maçî lêwt meylî ennab û şeker nakem
Ke rûy to derkewê qet rû le rûy şemis û qemer nakem
Eger bêt û gedayî koyî dildarim be qîsmet bê
Be dil yadî şehnişahî û supah û kerufer nakem

Xwa bîka eger rojê qedem bênête ser çawim
Tenezul bo cewahîrsurme û kuhlulbeser nakem

Be tîxî ebruwanî xoy îşarey kird ke bo qetlim
Leber ew mujde eslen meylî qelxan û super nakem

Qelender meşrebî û dêwaneyî xoşe le dinyada
Be feqrî xom rezam eslen xeyalî zîw û zer nakem

Nzîkîy piyawî ehmeq baîsî fewtanî însane
Heta umrim bibê qet min refîqîy piyawî ker nakem

Ke min maîl be xêrm xîlqeten Ehmed bexorayî
Wekû însanî cahîl meylî fîtne û şor û şer nakem