چێشتم ئەمڕۆ

چێشتم ئەمڕۆ ژەهری مار و ڕۆحی شیرینم نەهات
زەخمی کۆنەم هاتە ژان و مەرهەمی برینم نەهات

من غەمم خوارد و غەمیش خوێنی جگەرمی خواردەوە
بۆیە گریام چەند بە چەند فرمێسکی خوێنینم نەهات

غەم سەری لێ دام و یارم قەت سەرێکی لێ نەدام
سەبر و هۆشم ڕۆیوە غارەتگەری دینم نەهات

دڵ دەسووتێ چین بە چین دەشکێتە سەر یەک وەک فەنەر
ساحێبی ڕووی ئاتەشین و زوڵفی چین-چینم نەهات

جەرگ و دڵ هەر دوو لەنێو نافەی دەرووندا بوون بە خوێن
شەممەیێ لەو مسکی نافەی ئاسکەکەی چینم نەهات

دیدە وەک هەوری بەهاران خوێن دەبارێنی و سەدای
پێکەنینی خونچەی نەو سەبزە پەرژینم نەهات

گۆی سەرم چەوگانی میحنەت دایە بەر خۆی ڕای ڕفاند
ئەلعەجەب بۆ شەهسواری خانەی ژینم نەهات

بۆ چیمە گیان و لەشی بێ دڵ دڵیش بەندی ستەم
هێندە بێزارم بە زەهریش خاتیمەی ژینم نەهات

کەوتمە وەزعی نەزع و غەم خستمیە حاڵی غەرغەرە
[کوردی] بێکەس خۆم لە هیچ لایەک سەدای شینم نەهات

Çêştim emro jehrî mar û rohî şîrînim nehat
Zexmî konem hate jan û merhemî birînim nehat

Min xemim xward û xemîş xwênî cigermî xwardewe
Boye giryam çend be çend firmêskî xwênînim nehat

Xem serî lê dam û yarim qet serêkî lê nedam
Sebir û hoşim roywe xaretgerî dînim nehat

Dil desûtê çîn be çîn deşkête ser yek wek fener
Sahêbî rûy ateşîn û zulfî çînçînim nehat

Cerg û dil her dû lenêw nafey derûnda bûn be xwên
Şemeyê lew miskî nafey askekey çînim nehat

Dîde wek hewrî beharan xwên debarênî û seday
Pêkenînî xunçey new sebze perjînim nehat

Goy serim çewganî mîhnet daye ber xoy ray rifand
Eleceb bo şehiswarî xaney jînim nehat

Bo çîme giyan û leşî bê dil dilîş bendî sitem
Hênde bêzarim be zehrîş xatîmey jînim nehat

Kewtime wezî nez û xem xistimye halî xerxere
[Kurdî] bêkes xom le hîç layek seday şînim nehat