هەموو شەوێ

هەموو شەوێ پەنجەرەکەم لەسەر پشتە
ئەڵێم بەڵکوو چرپەیەکی تۆی لێوە بێ
شەماڵێ خۆی کا بە ژوورا
بۆنی عەتری تۆی پێوە بێ

گوێم هۆگری دەنگت بووە
لەو ڕۆژەوە کە دەنگی تۆم نەبیستووە
هەستی بیستنم کز بووە
گوێم لە ئاستی هەموو ئاوازێکی ترا داخستووە

بەڵێ گیانە هۆگرت بووم
خۆشەویستیت هەر زوو دیاری دا لەسەر ڕووم
تا وام لێ هات هەموو خەڵکی لە چاوانما تۆیان ئەدی
هەتا بوویتە کانگای عەشقێکی ئەبەدی

بەڵێ گیانە هەر دوای ئەوە
هەر دوای لەیەک دابڕان و جیابوونەوە
لە دوای ئەوەی لە دوورییا
بەشی زۆری تەمەن ڕۆیی
بەبێ بەزمی حزووری تۆ
حەرامم کردووە بادە
نەوەک بشکێ بە نەشئەی مەی
خوماری دەردی بێ تۆیی

ڕۆژێ ئەمرم
بەرگەی دووری تۆ ناگرم
ڕۆژێ ئەمرم
هەورێ داناکاتە باران
درەختێ ناداتە گریان
چونکە من ڕۆژێ لە ڕۆژان
تۆی ئازیزم لە خۆم تۆران

Hemû şewê pencerekem leser pişte
Elêm belkû çirpeyekî toy lêwe bê
Şemalê xoy ka be jûra
Bonî ’etrî toy pêwe bê

Gwêm hogrî dengit buwe
Lew rojewe ke dengî tom nebîstuwe
Hestî bîstinim kiz buwe
Gwêm le astî hemû awazêkî tira daxsituwe

Belê gyane hogirt bûm
Xoşewîstît her zû dyarî da leser rûm
Ta wam lê hat hemû xelkî le çawanma toyan edî
Heta bûyte kangay ’eşqêkî ebedî

Belê gyane her dway ewe
Her dway leyek dabran û cyabûnewe
Le dway ewey le dûrîya
Beşî zorî temen royî
Bebê bezmî hizûrî to
Heramim kirduwe bade
Newek bişkê be neş’ey mey
Xumarî derdî bê toyî

Rojê emirim
Bergey dûrî to nagirim
Rojê emirim
Hewrê danakate baran
Dirextê nadate giryan
Çunke min rojê le rojan
Toy azîzim le xom toran