کاتی بەهارە

کاتی بەهارە چاوەکەم! بێ بچینە باغی دووبەدوو
گوڵ بچنین بە هەردوو دەس، بێینە سەما و جوستوجوو

ساقی بە هەڵپەڕینەوە دێت و دەچێ لە نێو چەمەن
خونچە بە پێکەنینەوە دڵ دەڕفێنێ زوو بە زوو

بولبول و قومری هەر تەڕەف سازی تەڕەب دەکەن، کەچی
لە شاخی گوڵ، لە داخی دڵ خۆ دەنوێنێ کوندەبوو

عەڕعەڕ و سەرو و نارەوەن پاکی بە دەم نەسیمەوە
بە ڕەقس و شەوق و زەوقەوە دێن و دەچن بە ئارەزوو

ئەدەب دڕا دەفی لەبەر تەرەب لە باخ و گوڵشەنا
لە لای بەشەر لەبۆ دەوا نەما حەیا و ئابڕوو

خۆشییە، کەیفە، شادییە، بەزمە، هەرایە، چۆپییە
بە عیشقی بووکی بولبولێ*، خونچە کە بووکە، دڵ خەسوو

ڕاز و نیازی دڵ دەکەن بولبول و قومری پێکەوە
هەردوو بە فکری بیکرەوە، خونچە بە یەک دەدەن بە شوو

هەر بەتەنێ 'ئیمای'یە بێبەش و بەهرە مایەوە
خەرمەنی خەم بە با دەکا، دەنکی ئەسەف دەکا بە توو

Katî behare çawekem! bê biçîne baxî dûbedû
Gul biçnîn be herdû des, bêyne sema û custucû

Saqî be helperînewe dêt û deçê le nêw çemen
Xunçe be pêkenînewe dil derfênê zû be zû

Bulbul û qumrî her teref sazî tereb deken, keçî
Le şaxî gul, le daxî dil xo denwênê kundebû

’er’er û seru û narewen pakî be dem nesîmewe
Be reqis û şewq û zewqewe dên û deçin be arezû

Edeb dira defî leber tereb le bax û gulşena
Le lay beşer lebo dewa nema heya û abrû

Xoşîye, keyfe, şadîye, bezme, heraye, çopîye
Be ’îşqî bûkî bulbulê*, xunçe ke bûke, dil xesû

Raz û nyazî dil deken bulbul û qumrî pêkewe
Herdû be fikirî bîkirewe, xunçe be yek deden be şû

Her betenê 'îmay'ye bêbeş û behre mayewe
Xermenî xem be ba deka, denkî esef deka be tû