پەرچەم

ئەگەر پرچت ئەهۆنییەوە ئەیکەم بە ڕەشماری گەردن
با دیاریی خۆشەویستی بێ بیئاڵێنە گەردنی من
ئەگەر پرچت ناهۆنییەوە پەنجەم بکەم بە شانە بۆت
هێدی هێدی دەریەهێنم تاوێ هەڵمژم تام و بۆت

گۆزەی سەر شان ڕوو لە خۆر کە با سێبەر بکا بۆ دوو چاوت
با خۆر نەیبات کوڵمی سوورت دەئاڵۆسکێ پرچی خاوت
ئەگەر پرچت هۆنراوەیە ئەیکەم بە ئاوازی بەستەم
گەر دەرگای دڵ کراوەیە چۆن تێکەڵ نابێ بە جەستەم

زوڵفی ڕەشت مۆسیقایە بۆ نۆتەی سەر ستەندەکەم
تاڵی تەلی ژێر پەنجەمە ئەیهەژێنێ کەمانچەکەم
ئەگەر زوڵفت بچێنرایە خۆم ئەکردە وەستای چنین
ئەبوومە باخەوانی باڵات بۆ ماچی لێو، بۆ بەی گوشین

Eger piriçit ehonîyewe eykem be reşmarî gerdin
Ba dyarîy xoşewîstî bê bî’alêne gerdinî min
Eger piriçit nahonîyewe pencem bikem be şane bot
Hêdî hêdî deryehênim tawê helmijim tam û bot

Gozey ser şan rû le xor ke ba sêber bika bo dû çawit
Ba xor neybat kulmî sûrit de’aloskê pirçî xawit
Eger piriçit honraweye eykem be awazî bestem
Ger dergay dil kiraweye çon têkel nabê be cestem

Zulfî reşt mosîqaye bo notey ser sitendekem
Talî telî jêr penceme eyhejênê kemançekem
Eger zulifit biçênraye xom ekirde westay çinîn
Ebûme baxewanî balat bo maçî lêw, bo bey guşîn