بۆنی بەهار هات

بۆنی بەهار هات بۆنی تۆ نایە
تۆ نیت گوڵ بێنیت بۆ زولفی دایە
پەڕەسیلکەکان لە گەڕانەوە
تۆ بۆ دیار نیت لە ئاسمانەوە
گوایە نەماوە باڵی فڕینت
ناتەواو ماوە چیرۆکی ژینت

لە کام مەحکەمە حوکمی وا درا
ناسکەگوڵ بێتە سپەڕی بەڵا
لای کامین قازی سکاڵای تۆ کەم
لەسەر کام گڵکۆ هەی ڕۆ هەی ڕۆ کەم
سروشتی ئەمساڵ بێ تۆ ملکزە
نە سەوزە سەوزە نە گوڵ بە بزە

لە جەژنی بەهار لێت چاوەڕوانە
نێرگزی پێ بەی بە نەورۆزانە
نامە بنێرە وەک بەهاری پار
جلی بووکینێ پێشکەش کە بە یار
نەماوە بۆنت نەشماوە دەنگت
نەماوە شێوەی جوانی قەشەنگت

عەشق و فڕین و ژیانت گۆڕان
پێموایە چوویتە ڕیزی هەڤاڵان
هەر مەلە بێ پەڕ ئەکەوێتە خوار
هەر باڵا ئەشکێ لە فەسڵی بەهار
بۆنی بەهار هات بۆنی تۆ نایە
تۆ نیت گوڵ بێنی بۆ زولفی دایە

Bonî behar hat bonî to naye
To nît gul bênît bo zulfî daye
Peresîlkekan le geranewe
To bo dyar nît le asmanewe
Gwaye nemawe balî firînit
Natewaw mawe çîrokî jînit

Le kam mehkeme hukmî wa dira
Naskegul bête siperî bela
Lay kamîn qazî sikalay to kem
Leser kam gilko hey ro hey ro kem
Siruştî emsal bê to milkize
Ne sewze sewze ne gul be bize

Le cejnî behar lêt çawerwane
Nêrgizî pê bey be newrozane
Name binêre wek beharî par
Cilî bûkînê pêşkeş ke be yar
Nemawe bonit neşmawe dengit
Nemawe şêwey cwanî qeşengit

’eşq û firîn û jyanit goran
Pêmwaye çûyte rîzî hevalan
Her mele bê per ekewête xwar
Her bala eşkê le feslî behar
Bonî behar hat bonî to naye
To nît gul bênî bo zulfî daye