پارادۆکس

پارادۆکس
گشت زمانن زوورەیە و زوو زوو قسەی ناسک دەکەین
بۆ فریوی یەک، دەم و ڕوو دیلی ژێر ماسک دەکەین

فێری چاڵ و کەندەڵان و بوودڕ  و گۆڕی ڕەشین
دەم کە دەبزێوین کەچی باسی چیا و باسک دەکەین

نێر و مێمان زگپڕی قین و تەماحن بۆیە وا
دەوروبەرمان پڕ وچەی داخە و لە پەستا سک دەکەین

ئێمە دیلی دەستی گێژ و فەرتەنەین و دوورە ڕۆخ
پشت و پێمان لێی بڕا هێز و مەلەی باسک دەکەین

ڕێ، لە ڕوومان شەرمەزارە و چۆکی ناسیوین زەوی
کیسەڵئاسا ڕێ دەکەین، هاوڕێیەتیی ئاسک دەکەین

داری قرچۆکین و دەستەملانی هاژەی باگەڕین
ماڵی دڵمان شووشەیە و یاری بە قەڵماسک دەکەین

گەردەلوولی سەرکەشین و لافی شیبا لێ دەدەین
خونچە گوڵ پەڕپەڕ دەکەین، لای لایە بۆ لاسک دەکەین

باوی ئەمڕۆن دوو زمانی و فێڵ و دووڕوویی و درۆ
گشت زمانن زوورەیە و زووزوو قسەی ناسک دەکەین

Paradokis
Gişt zimanin zûreye û zû zû qisey nask dekeyn
Bo firîwî yek, dem û rû dîlî jêr mask dekeyn

Fêrî çal û kendelan û bûdir û gorî reşîn
Dem ke debzêwîn keçî basî çya û bask dekeyn

Nêr û mêman zigpirî qîn û temahin boye wa
Dewruberman pir wiçey daxe û le pesta sik dekeyn

Ême dîlî destî gêj û ferteneyn û dûre rox
Pişt û pêman lêy bira hêz û meley bask dekeyn

Rê, le rûman şermezare û çokî nasîwîn zewî
Kîsel’asa rê dekeyn, hawrêyetîy ask dekeyn

Darî qirçokîn û destemlanî hajey bagerîn
Malî dilman şûşeye û yarî be qelmask dekeyn

Gerdelûlî serkeşîn û lafî şîba lê dedeyn
Xunçe gul perper dekeyn, lay laye bo lask dekeyn

Bawî emron dû zimanî û fêl û dûrûyî û diro
Gişt zimanin zûreye û zûzû qisey nask dekeyn