دەسا ڕێگام بدەن

دەسا ڕێگام بدەن خەڵکە لەگەڵ خۆما کەمێ بدوێم
وەکوو فرمێسکی چاوی غەم بەسەر دڵما کەمێ بڕژێم
کەمێ بڕوانمە ئەو ڕێچکەی کە پێم تیا گرت و پیا هاتم
هەتا ئێستاش سەری نەدا لە دەرگای شاری ئاواتم

مەتاڵەی کەم پەڕەی مێژووی ژیانی تاڵی ڕابردووم
هەمووی عومری بە ناسۆر و هەموو ڕۆژێکی بابردووم
سەری دێڕ و بنی دێڕی هەمووی هەر ئاخە تاساوە
بە فرمێسکی بەسەر چاوی هیواما هەوری کێشاوە

لەسەر ڕێما نەبوو دارێ لە سێبەریا هەتا تاوێ
وچانێ با لەشی ماندووم کەمێکیش لێک بنێم چاوێ
شنەی سەر ئاو و ناو باخێ نەبوو گیانم ببزوێنێ
چرۆی بەخت و هیوای جوانیم بە ئەسپایی بپشکوێنێ

دەسا ئەی خەم دەسا هاوڕێی شەو و ڕۆژ و هەموو ساتم
دەستت ڕابگرە بۆ دەستم زەبوونم ڕووبەڕووت هاتم
لە مەیخانەی شەوا با بێ مەی خەستی هەزار ساڵە
لە تاڵاوە وەهام گێژ کا نەزانم عومری خۆم تاڵە

دەسا ڕێگام بدەن خەڵکە لەگەڵ خۆما کەمێ بدوێم
وەکوو فرمێسکی چاوی غەم بەسەر دڵما کەمێ بڕژێم
کەمێ بڕوانمە ئەو ڕێچکەی کە پێم تیا گرت و پیا هاتم
هەتا ئێستاش سەری نەدا لە دەرگای شاری ئاواتم
مەتاڵەی کەم پەڕەی مێژووی ژیانی تاڵی ڕابردووم
هەمووی عومری بە ناسۆر و هەموو ڕۆژێکی بابردووم
سەری دێڕ و بنی دێڕی هەمووی هەر ئاخە تاساوە
بە فرمێسکی بەسەر چاوی هیواما هەوری کێشاوە

Desa rêgam biden xelke legel xoma kemê bidwêm
Wekû firmêskî çawî xem beser dilma kemê birjêm
Kemê birwanme ew rêçkey ke pêm tya girt û pya hatim
Heta êstaş serî neda le dergay şarî awatim

Metaley kem perey mêjûy jyanî talî rabirdûm
Hemûy ’umrî be nasor û hemû rojêkî babirdûm
Serî dêr û binî dêrî hemûy her axe tasawe
Be firmêskî beser çawî hîwama hewrî kêşawe

Leser rêma nebû darê le sêberya heta tawê
Wiçanê ba leşî mandûm kemêkîş lêk binêm çawê
Şiney ser aw û naw baxê nebû gyanim bibziwênê
Çiroy bext û hîway cwanîm be espayî bipşikiwênê

Desa ey xem desa hawrêy şew û roj û hemû satim
Destit rabgire bo destim zebûnim rûberût hatim
Le meyxaney şewa ba bê mey xestî hezar sale
Le talawe weham gêj ka nezanim ’umrî xom tale

Desa rêgam biden xelke legel xoma kemê bidwêm
Wekû firmêskî çawî xem beser dilma kemê birjêm
Kemê birwanme ew rêçkey ke pêm tya girt û pya hatim
Heta êstaş serî neda le dergay şarî awatim
Metaley kem perey mêjûy jyanî talî rabirdûm
Hemûy ’umrî be nasor û hemû rojêkî babirdûm
Serî dêr û binî dêrî hemûy her axe tasawe
Be firmêskî beser çawî hîwama hewrî kêşawe