بلوێری شوان ٢

نیوەشەوە دنیا خامۆش دێتە گوێم ئاهەنگێکی خۆش
ئاهەنگێکی گیانپەروەرە شادی هێنە خەفەتبەرە
ئاهەنگێکی دڵنەوازە تارە یۆڵۆنە یا سازە

هەزار خۆزگەم بە خۆت شوانە کە بەو مانگەشەوە جوانە
دانیشتووی لەسەر ئاوهەڵدێر قامکان دەبزێوی لە بلوێر
ئاغاش بە نۆکەر ناگری وەک من لە داخا نامری
دەگەڵ تەبیعەت هاودەمی شادی، بە کەیفی، بێ غەمی

توخدا شوانە هەموو شەوێ لای نیوەشەو کاتی خەوێ
لەو شاخ و کێو و زەنوێرە تێی تووڕێنە لەو بلوێرە
لەسەر ترۆپکی ئەو کێوە قامکان لە بلوێر ببزێوە
با کێوەکە دەنگ داتەوە شاعیریش خەو بیباتەوە

Nîweşewe dinya xamoş dête gwêm ahengêkî xoş
Ahengêkî gyanperwere şadî hêne xefetbere
Ahengêkî dilnewaze tare yolone ya saze

Hezar xozgem be xot şwane ke bew mangeşewe cwane
Danîştûy leser awheldêr qamkan debzêwî le bilwêr
Axaş be noker nagrî wek min le daxa namrî
Degel tebî’et hawdemî şadî, be keyfî, bê xemî

Tuxda şwane hemû şewê lay nîweşew katî xewê
Lew şax û kêw û zenwêre têy tûrêne lew bilwêre
Leser tiropkî ew kêwe qamkan le bilwêr bibzêwe
Ba kêweke deng datewe şa’îrîş xew bîbatewe