کۆبانی

لوتکەی هەڵوێستی ئینسانیی
گیانی شیرینم کۆبانی

دڵم، چاوم، هەوێنی شیعرم، هەناوم
شکۆداری، گەشی، بەرزی، دارستانی
باخی، ڕەزی، لانەی شێر و هەڵۆ و تەوار و تەڕلانی
گیانی شیرینم کۆبانی

تۆ کاکڵێ واتای ژیانی
ژیلەمۆی ئاگری زەردەشت
هەیڤی، تاوی، شاخی، دەشتی، باهۆزی، بروسکەی، هەوری
چۆک بە مردن دادەدەیت و واتای داکەوتن نازانی
گیانی شیرینم کۆبانی

مەکۆی خورتی ڕەند و کیژی ڕندی
دوندی
لوتکەی چیای
سەرهەڵدانی
بلاوێنی، گەشی، ڕوونی
مانای پیرۆزی هەر بوونی
شادەماری کوردستانی
گیانی شیرینم کۆبانی

مۆسیقای، شمشاڵی، بەستەی
زایەڵەی خۆشی* حەیرانی
قەڵای، شوورەی، بای
گڕکانی
پەیامی سەوزی سەربەستییت
لە جێژوانی
وەک گوڵدانی
ڕازێنەری پەنجەرەی هەموو ماڵانی
گیانی شیرینم کۆبانی

گەردەلوولی، خۆڕاگری
کەلاتی* ورە و ئاگری
وەشتی، شەماڵی، زریانی
شریخەی هەور و بارانی
لە لەشمانا خوێنی، گیانی
بۆ هەتا دنیا دنیایە
تۆ کۆبانی**
بە ناو چاوانی مێژوودا شائەستێرەی
شائەستێرەی درەوشاوەی بەرخۆدانی
گیانی شیرینم کۆبانی

هۆنراوە: حەسەن شافعی
*= ئەو وشانە لە هۆنراوەی شاعیردا بە شێوەی "سۆزی" و "کەڵاتی" هاتووە.
**= ئەو بەشە لە هۆنراوەی شاعیردا نەهاتووە.

Lutkey helwêstî însanîy
Gyanî şîrînim kobanî

Dilim, çawim, hewênî şî’irim, henawim
Şikodarî, geşî, berzî, daristanî
Baxî, rezî, laney şêr û helo û tewar û terlanî
Gyanî şîrînim kobanî

To kaklê watay jyanî
Jîlemoy agirî zerdeşt
Heyvî, tawî, şaxî, deştî, bahozî, biruskey, hewrî
Çok be mirdin dadedeyt û watay dakewtin nazanî
Gyanî şîrînim kobanî

Mekoy xurtî rend û kîjî rindî
Dundî
Lutkey çyay
Serheldanî
Bilawênî, geşî, rûnî
Manay pîrozî her bûnî
Şademarî kurdistanî
Gyanî şîrînim kobanî

Mosîqay, şimşalî, bestey
Zayeley xoşî* heyranî
Qelay, şûrey, bay
Girkanî
Peyamî sewzî serbestîyt
Le cêjwanî
Wek guldanî
Razênerî pencerey hemû malanî
Gyanî şîrînim kobanî

Gerdelûlî, xoragrî
Kelatî* wire û agirî
Weştî, şemalî, ziryanî
Şirîxey hewr û baranî
Le leşmana xwênî, gyanî
Bo heta dinya dinyaye
To kobanî**
Be naw çawanî mêjûda şa’estêrey
Şa’estêrey direwşawey berxodanî
Gyanî şîrînim kobanî

Honrawe: hesen şaf’î
*= ew wişane le honrawey şa’îrda be şêwey "sozî" û "kelatî" hatuwe.
**= ew beşe le honrawey şa’îrda nehatuwe.