ئاواتی دووری

ئەی چاو! چەشنی بازی قەفەس هەڵوەرێ* پەڕت
کوا باڵە تیژەکانی نیگای جوانی* دولبەرت؟
کوانێ دوو چاوی مەست؟ کوانێ؟
دوو* برۆی پەیوەست؟ کوانێ؟
کوانێ زوڵفی ڕەش؟
کوڵمی ئاڵ و گەش؟
کوا هەیکەلی جەمال؟
جوانی* بێ میسال؟

ئەی گوێ! زەلیلی چاوم و بەر تۆ پەنا ئەبەم!
دەنگێ لە یاری دوورەوە، چی بکەم لە زیل و بەم؟
با بێ، خەندەی پڕ ئاهەنگ بێ!
نەغمە و نازی* شۆخ و شەنگ بێ!
زڕەی بازن بێ!
ڕووەو لای من بێ!
هاڕەی هەیاسەکەی
ورشەی کراسەکەی!...

ئەی لامیسە! ئەگەرچی نەبوو دەنگ و ڕەنگ و بۆ
وەک شێت بە عەقڵی خامەوە خۆم خستە بەختی تۆ!
کوا تەماسی لەشی نەرمی؟
کوا لەزەتی کۆشی گەرمی!
کوا مەمکی پڕ چنگ؟
لیمۆی باخی سنگ؟
کوا ماچی لێوی ئاڵ؟
جورعەی ئەبەدی* خەیاڵ؟

هۆنراوە: گۆران

*= لە هۆنراوەی شاعیردا لەباتیی ئەم وشانە سەرەوە وشە و دەستەواژەگەلی "هەڵوەری"، "حوسنی"، "کوانێ"، "کوا حوسنی"، "نەغمەی نازی" و "ئەبەد" هاتووە.

سەرچاوەی دەق: ڤەژینبووکس

Ey çaw! çeşnî bazî qefes helwerê* perit
Kwa bale tîjekanî nîgay cwanî* dulberit?
Kwanê dû çawî mest? kwanê?
Dû* biroy peywest? kwanê?
Kwanê zulfî reş?
Kulmî al û geş?
Kwa heykelî cemal?
Cwanî* bê mîsal?

Ey gwê! zelîlî çawim û ber to pena ebem!
Dengê le yarî dûrewe, çî bikem le zîl û bem?
Ba bê, xendey pir aheng bê!
Nexme û nazî* şox û şeng bê!
Zirey bazin bê!
Ruwew lay min bê!
Harey heyasekey
Wirşey kirasekey!...

Ey lamîse! egerçî nebû deng û reng û bo
Wek şêt be ’eqlî xamewe xom xiste bextî to!
Kwa temasî leşî nermî?
Kwa lezetî koşî germî!
Kwa memkî pir çing?
Lîmoy baxî sing?
Kwa maçî lêwî al?
Cur’ey ebedî* xeyal?

Honrawe: goran

*= le honrawey şa’îrda lebatîy em wişane serewe wişe û destewajegelî "helwerî", "husnî", "kwanê", "kwa husnî", "nexmey nazî" û "ebed" hatuwe.

Serçawey deq: vejînbûkis