پەیامی گوڵ

من مەجنوونی تاسەی دیداری تۆمە
بە هیوای ڕەونەقی گوڵزاری تۆمە
فەرامۆشم نەکەی ئەی نووری چاوم
کە من کوشتەی وەرزی بەهاری تۆمە

شنەی شەوان شەپۆلی شەم دەفڕێنێ
شەمی شەمدانی شەو دەسووتێنێ
شانەی شلی شێتانەی شەرمنی شەو
پەنجەی شەوە پەیامی گوڵ دەهێنێ

من مەڕمەڕی شکاوی دەستی ڕۆژگار
کوێرە ڕێگا و کەلاوەی دوورەهاوار
دەناڵێنم لە شەوگاری بێکەسی
لە رۆژگاری خەفەتبار و گرفتار
وەکوو بولبول دڵێ بکەوتە ناڵە
چ ناڵینێ بناڵێ بە ناڵە
کە ناڵەی هات لە باخان بولبولی مەست
تۆش بناڵە بە ناڵینی ئەو ناڵە

هۆنراوە: زەینەب خان (کچە کورد)

Min mecnûnî tasey dîdarî tome
Be hîway rewneqî gulzarî tome
Feramoşim nekey ey nûrî çawim
Ke min kuştey werzî beharî tome

Şiney şewan şepolî şem defrênê
Şemî şemdanî şew desûtênê
Şaney şilî şêtaney şerminî şew
Pencey şewe peyamî gul dehênê

Min mermerî şikawî destî rojgar
Kwêre rêga û kelawey dûrehawar
Denalênim le şewgarî bêkesî
Le rojgarî xefetbar û giriftar
Wekû bulbul dilê bikewte nale
Çi nalînê binalê be nale
Ke naley hat le baxan bulbulî mest
Toş binale be nalînî ew nale

Honrawe: zeyneb xan (kiçe kurd)