لە پاش کۆچت

لەپاش کۆچت هەنگی ڕۆحم لە ناو ڕۆحما بەجێ ماوە
چاوەکانم دەریای ئەشکی چاوەکانتیان تێ ڕژاوە
سروەی دەنگە بەسۆزەکەت لە ناخمدا سەما دەکا
هەموو ڕۆژێک بۆ دیتنەوەت دڵم هەر بە تەما دەکا

هەتا ماوم هیچ ئاوازێ هەستی هەناوم ناگۆڕێ
بەو کۆچەی تۆ خەم لەناخی دڵی تاساوم دەچۆڕێ
خاتوونێ خاتوونەکەم نیشتمانم جێ مەهێڵە
نیشتمانی ئەم دڵەی من ڕێبوارێکی ماندووی وێڵە

تۆ دەزانی چەند هەناسەی یادگاریم لە سینگتایە
چەند دیمەنی پڕ ژوانمان لە ئالبۆمی دیدەتایە
تۆ دەزانی ڕۆژانێک بوو نیوەی جەستەی لاوازم بووی
نەغمەی تاری پڕ لەسۆز و چەلۆی دەنگ و ئاوازم بووی

کەچی ئێستا منی بێ تۆ شەپۆلێکی بێ کەنارم
میوانێکی بێ خانەخوێ و کوێستانێکی بێ هەوارم
باڵندەکانیش وەکوو من بۆ هاتنەوەت دەم بە دوێتن
تێکڕا کۆڕی پەپوولەکان بە سروودێک چاوەڕێتن
دڵنیا بە و چاوەڕێ بە خاتوونەکەم هەر دێمە لات
دیاری دەستم بەراتێکە پڕ لە ماچی دەمی وڵات

Lepaş koçit hengî rohim le naw rohma becê mawe
Çawekanim deryay eşkî çawekantiyan tê rijawe
Sirwey denge besozeket le naximda sema deka
Hemû rojêk bo dîtnewet dilim her be tema deka

Heta mawim hîç awazê hestî henawim nagorê
Bew koçey to xem lenaxî dilî tasawim deçorê
Xatûnê xatûnekem nîştmanim cê mehêle
Nîştmanî em diley min rêbwarêkî mandûy wêle

To dezanî çend henasey yadgarîm le sîngtaye
Çend dîmenî pir jwanman le albomî dîdetaye
To dezanî rojanêk bû nîwey cestey lawazim bûy
Nexmey tarî pir lesoz û çeloy deng û awazim bûy
Keçî êsta minî bê to şepolêkî bê kenarim
Mîwanêkî bê xanexwê û kwêstanêkî bê hewarim

Balindekanîş wekû min bo hatnewet dem be dwêtin
Têkra korî pepûlekan be sirûdêk çawerêtin
Dilniya be û çawerê be xatûnekem her dême lat
Diyarî destim beratêke pir le maçî demî wilat