سەفەرێکی نەهات

بەرەو کوێستان ئەهاتمەوە
جانتام پڕ بوو لە ئاوات و حەز و تاسە
هێندە تینوو
هێندە تامەزرۆی دیدار بووم
دەمویست بەفری ساڵی نەهات
بتوێنمەوە بە هەناسە!
بۆ لای کاڵێ ئەهاتمەوە
عەشقی قەڵای بەرزی هەست و
دڵی منیش کۆترە برجیلەی ماڵی بوو
کاڵێ ڕۆحی سەوزی دەشت و
چاوی گوند و
هێزی عەشق و
گەورەتر لە «عەنبەر خاتوونی» «مەولانا» و
جوانتر لە «خاتوو حەبیبە»ی دیوانی شیعری «نالی» بوو!
دێر هاتمەوە، دێر هاتمەوە!
کوێستان چۆڵ بوو...
چاوی ئاسمان، لێڵ ئەیڕوانی
جێژوانەکەی جاران بۆنی
خەمێکی زەردی لێ ئەهات!
پڕ لە چقڵ و خاک و خۆڵ بوو!
ئیتر دنیا ڕەش ئەنوێنێ
لە ناو دڵما کەوی تەنیای شیعر دڵتەنگ
دڵتەنگ، دڵتەنگتر لە کوێستان
سیاوچەمانەی فرمێسک و خوێن ئەچریکێنێ

Berew kwêstan ehatmewe
Cantam pir bû le awat û hez û tase
Hênde tînû
Hênde tamezroy dîdar bûm
Demwîst befrî salî nehat
Bitwênmewe be henase!
Bo lay kalê ehatmewe
’eşqî qelay berzî hest û
Dilî minîş kotre bircîley malî bû
Kalê rohî sewzî deşt û
Çawî gund û
Hêzî ’eşq û
Gewretir le «’enber xatûnî» «mewlana» û
Cwantir le «xatû hebîbe»y dîwanî şî’rî «nalî» bû!
Dêr hatmewe, dêr hatmewe!
Kwêstan çol bû...
Çawî asman, lêl eyriwanî
Cêjwanekey caran bonî
Xemêkî zerdî lê ehat!
Pir le çiqil û xak û xol bû!
Îtir dinya reş enwênê
Le naw dilma kewî tenyay şî’ir dilteng
Dilteng, diltengitir le kwêstan
Syawçemaney firmêsk û xwên eçrîkênê