خاسەکەو

لێیگەڕێن با باڵ و پەڕی جوان بکا
لەو کەلە با بانگی ڕەفیقان بکا
لێیگەڕی با دەندووکی بە بەرد تیژ بکا
غوڕڕە بکا بانگی کوڕ و کیژ بکا

خاسەکەوێ لەو کەلە* هەڵنیشتووە
خاڵی ڕەش و سووری بە جووت ڕشتووە
ڕاوچی هەمووی لەو کەوە دەرکەوتووە
بۆچی دزە؟ جەردەیە؟ کێی کوشتووە؟

بۆچی کەویش مافی ژیانی نییە؟
حەقی کەژ و کێوی جوانی نییە؟
خاوەنی ئەو کێو و کەژە هەر کەوە
نەزم و نیزامی کەژ و کێو هەر بەوە

خاسەکەوێ لەو کەلە هەڵنیشتووە
خاڵ ڕەش و سووری بە جووت ڕشتووە
ڕاوچی هەمووی لەو کەوە دەرکەوتووە
بۆچی دزە؟ جەردەیە؟ کێی کوشتووە؟
پاکی گوناهی کەوی خۆش خەتتوخاڵ
ژینی بە ئازادی لە نێو دڕک و داڵ
باعیسی قەتڵی چییە؟ بیستوویەتی
ژینی بە ئازادییە ویستوویەتی

Lêygerên ba bal û perî cwan bika
Lew kele ba bangî refîqan bika
Lêygerî ba dendûkî be berd tîj bika
Xurre bika bangî kur û kîj bika

Xasekewê lew kele* helnîştuwe
Xalî reş û sûrî be cût riştuwe
Rawçî hemûy lew kewe derkewtuwe
Boçî dize? cerdeye? kêy kuştuwe?

Boçî kewîş mafî jyanî nîye?
Heqî kej û kêwî cwanî nîye?
Xawenî ew kêw û keje her kewe
Nezim û nîzamî kej û kêw her bewe

Xasekewê lew kele helnîştuwe
Xal reş û sûrî be cût riştuwe
Rawçî hemûy lew kewe derkewtuwe
Boçî dize? cerdeye? kêy kuştuwe?
Pakî gunahî kewî xoş xettuxal
Jînî be azadî le nêw dirk û dal
Ba’îsî qetlî çîye? bîstûyetî
Jînî be azadîye wîstûyetî