دێوەرە و کەر

دێوەرەیێک بە سواری کەر
ڕێیەکی دووری گرتە بەر

نەیهێڵا کەر بدا بێنێ
تا ڕێیان کەوتە بژوێنێ

کەر کە بینیی وا لەو ناوە
گیاوگۆڵ سەری پێوەناوە

مێوانی گەورەی سروشتە
نە خێو نە باری لە پشتە

بە زەڕەزەڕ بە غارەغار
دنیای هەموو کردە بەهار

لەپڕ خاوەن کەری زۆرزان
هەستی کرد وا لەودیو تەلان

هەرا و هۆریا و دەنگەدەنگە
ئیتر زانی کاری لەنگە!

گوتی: کەرە گیان گوێ گرە
ئەو دەنگە دەنگی ڕێگرە!

هەتا زووە با بارت کەم
لە ڕێگران ڕزگارت کەم

کەر دایە قاقای پێکەنین
گوتی: قوربان هاوڕێی شیرین!

بارەکەی من لە خۆت بار کە
هەتا زووە خۆت ڕزگار کە

کە من کەر بم بارەبەر بم
کورتان لە پشت قوڕبەسەر بم

فەرقی چییە؟ دەرد هەر دەردە
کەری تۆ بم یا ەی جەردە!

Dêwereyêk be swarî ker
Rêyekî dûrî girte ber

Neyhêla ker bida bênê
Ta rêyan kewte bijwênê

Ker ke bînîy wa lew nawe
Gyawgol serî pêwenawe

Mêwanî gewrey siruşte
Ne xêw ne barî le pişte

Be zerezer be xarexar
Dinyay hemû kirde behar

Lepir xawen kerî zorzan
Hestî kird wa lewdîw telan

Heraw horyaw dengedenge
Îtir zanî karî lenge!

Gutî: kere gyan gwê gire
Ew denge dengî rêgre!

Heta zuwe ba barit kem
Le rêgran rizgarit kem

Ker daye qaqay pêkenîn
Gutî: qurban hawrêy şîrîn!

Barekey min le xot bar ke
Heta zuwe xot rizgar ke

Ke min ker bim bareber bim
Kurtan le pişt qurbeser bim

Ferqî çîye? derd her derde
Kerî to bim ya ey cerde!