گوڵی خوێناوی

کوڕ: بڕوانە! شایییە، چۆپییە، لەو ماڵە
گوێ بگرە! دەهۆڵە، زوڕنایە، شمشاڵە!
زەرد و سوور تێکەڵ بوون، ژن و پیاو، هەرایە
لەو ناوە هەر هاڕەی هەیاسەی تۆ نایە!
سا توخوا خێراکە با بڕۆین دەست بگرین
بە کامی دڵداری پێکەوە هەڵپەڕین!
کچ: گوڵ نەبێ بۆ سەرم ئاڵ چەپکێ، زەرد چەپکێ
نایەم بۆ زەماوەن، نایەم بۆ هەڵپەڕکێ!
کوڕ:کچ لە ڕێی جوانیتا، کچ لە ڕێی جوانیتا
کچ لە ڕێی نیونیگای هاتوچۆی کانیتا
پاییزە، گەڵای دار ڕژاوە، باغ ڕووتە
گوڵ کوانێ؟ گوڵ لێوی بە بزە پشکووتە!
کچ:گوڵ نەبێ بۆ سەرم زەرد چەپکێ، ئاڵ چەپکێ
نایەم بۆ زەماوەن، نایەم بۆ هەڵپەڕکێ!

بتدایە دڵ بە من، بە هەموو مەعناوە
دوو چەپکت ئەهانی لە باغچەی پاشاوە!
کوڕ (ئەڕوا و لەبەر خۆیەوە بە گۆرانی ئەڵێ:
باغچەی پاشا لەوبەر ئاوە
خێڵی دوشمن دەورەی داوە
ئەڕۆم: ڕێگام لێ گیراوە
ناڕۆم: چاوکاڵ لێم تۆراوە!
(بەرەبەرە لە دێ دوور کەوتەوە)
کوڕ:بە باغچەی پاشادا ورد گەڕام، خوار و ژوور
زەرد هەبوو، بۆم چنیت، چنگ نەکەوت گوڵی سوور
نازانم ئەمجا دێیت بۆ شایی و هەڵپەڕکێ؟
کچ: نایەم، گوڵ ماویەتی بۆ سەرم سوور چەپکێ!
کوڕ (یەخەی مراخانیی ترازان):
ناتەوێ ئەم زامی سەر دڵەم لەباتی؟
کچ: هەی هاوار! تفەنگی دوشمنیش پێکاتی؟
ڕاکشێ تاوێ سەر بنێرە سەر ڕانم؛
با بگریم بۆ دڵێ، بۆ گوڵێ دۆڕانم!

Kur: birwane! Şayîye, çopîye, lew male
Gwê bigre! dehole, Zurnaye, şimşale!
Zerd û sûr têkel bûn, jin û piyaw, heraye
Lew nawe her harey heyasey to naye!
Heste ba biroyn dest bigrîn
Be kamî dildarî pêkewe helperîn!
Kiç: gul nebê bo serim zerd çepkê, al çepkê
Nayem bo zemawen, nayem bo helperkê!

Kur: kiç le rêy ciwanîta, kiç le rêy ciwanîta
Kiç le rêy nîwnîgay hatuçoy kanîta
Payîze, gelay dar rijawe, bax rûte
Gul kwanê? Gul lêwî be bize pişkûte!
Kiç: gul nebê bo serim zerd çepkê, al çepkê
Nayem bo zemawen, nayem bo helperkê!
Bitdaye dil be min, be hemû me’nawe
Dû çepkit ehanî le baxçey paşawe!
Kur (erwa û leber xoyewe be goranî elê:
baxçey paşa lewber awe
Xêlî duşmin dewrey dawe
Erom: rêgam lê gîrawe
Narom: çawkal lêm torawe!
(berebere le dê dûr kewtewe)
Kur: be baxçey paşada wird geram, xwar û jûr
Zerd hebû, bom çnît, çing nekewt gulî sûr
Nazanim emca dêyt bo şayî û helperkê?
Kiç: nayem, gul mawyetî bo serm sûr çepkê!
Kur (yexey mraxanîy trazan):
Natewê em zamî ser dlem lebatî?
Kiç: hey hawar! Tfengî duşminîş pêkatî?
Rakşê tawê ser bnêre ser ranim;
Ba bigrîm bo dlê, bo gulê doranim!